“Yangi Andijon” shaharchasini barpo etish uchun 100 mln dollar ajratiladi

Jamiyat 3316
image

Andijon shahridagi “Yangi Andijon” shaharchasini barpo etish uchun 100 million dollar miqdorida mablag‘ ajratiladi. Bu haqda O‘zbekiston Prezidentining “Yangi Andijon” shaharchasini barpo etish va Andijon viloyatida tadbirkorlikni yanada qo‘llab-quvvatlash chora-tadbirlari to‘g‘risida”gi qarorida so‘z boradi.

Andijon viloyatida ijtimoiy-iqtisodiy va muhandislik-kommunikatsiya tarmoqlarini hamda tadbirkorlikni rivojlantirish uchun Tiklanish va taraqqiyot jamg‘armasidan quyidagi mablag‘lar ajratiladi:

“Yangi Andijon” shaharchasini barpo etish uchun O‘zbekiston Respublikasi Davlat byudjetiga markazlashgan investitsiyalarni oshirish hisobiga qaytarib bermaslik sharti bilan — 100 million dollar ekvivalentida, shundan:

  • 25 million dollar ekvivalentidagi mablag‘lar — ijtimoiy soha ob’ektlarini qurishga, shu jumladan Andijon tibbiyot instituti ob’ektlari uchun;
  • 15 million dollar ekvivalentidagi mablag‘lar — yo‘l o‘tkazgichini va yo‘l infratuzilma ob’ektlarini barpo etishga;
  • 60 million dollar ekvivalentidagi mablag‘lar — kommunikatsiya tarmoqlari, muhandislik infratuzilmasini yaratishga, loyihalashtirish ishlariga, qurilish ishlarini nazorat qilish, boshqarish va boshqa xarajatlarga;

Andijon viloyatida kichik va o‘rta tadbirkorlikni rivojlantirish uchun — 80 million dollar ekvivalentida tijorat banklariga, shundan:

  • 40 million dollar ekvivalentidagi mablag‘lar 3 yillik imtiyozli davr bilan 7 yil muddatga 7 foiz stavkasida — teng ulushda “O‘zsanoatqurilishbank” va “Qishloq qurilish bank” aksiyadorlik tijorat banklari orqali 200 ta mahallada kooperatsiya asosida kichik biznesni va oilaviy tadbirkorlikni rivojlantirishga ko‘maklashish maqsadida biriktirilgan «yetakchi» tadbirkorlik sub’ektlarini moliyaviy qo‘llab-quvvatlashga;
  • 40 million dollar ekvivalentidagi mablag‘lar 3 yillik imtiyozli davr bilan 7 yil muddatga 11 foiz stavkasida — “Agrobank” aksiyadorlik tijorat banki orqali issiqxona massivlarini barpo etish va aholi xonadonlarida issiqxonalar tashkil etishni moliyalashtirishga;
  • kichik biznes va oilaviy tadbirkorlikni rivojlantirish maqsadlari, shu jumladan bank kreditlari bo‘yicha kafilliklar berish uchun Tadbirkorlik faoliyatini qo‘llab-quvvatlash davlat jamg‘armasi resurs bazasini oshirish hamda Xonobod shahrida ijtimoiy-iqtisodiy va muhandislik-kommunikatsiya tarmoqlarini barpo etish tadbirlarini moliyalashtirish uchun Davlat byudjetiga qaytarib bermaslik sharti bilan — 20 million dollar ekvivalentida.

 
Hujjat Qonun hujjatlari ma’lumotlari milliy bazasida e’lon qilingan va joriy yilning 21 iyunidan kuchga kirdi.

Umidjon Nozimjonov
Maqolaga baho bering
Baholaganlar: 36
Reyting: 3.1
t
×