Yaqin yillarda Markaziy Osiyoda qurg‘oqchilik bo‘ladi – YeTB

2028-2029 yillarda Markaziy Osiyo doimiy suv tanqisligiga duch keladi. Bu haqda Yevrosiyo taraqqiyot banki xabar berdi. 

Bank boshqaruvi raisi Nikolay Podguzovning so‘zlariga ko‘ra, Markaziy Osiyo mamlakatlari besh yildan so‘ng suv tanqisligi va elektr energiyasiga bo‘lgan talabning oshishiga duch keladi.

Kelgusi 10 yil ichida Markaziy Osiyoda elektr energiyasiga talab sezilarli darajada oshishi kutilmoqda. 2035 yilgacha bo‘lgan davrda mavjud gidroelektr stansiyalarni modernizatsiya qilish va yangilarini qurish hisobiga mintaqadagi gidroelektr stansiyalar quvvatini 8900 MVtga oshirish rejalashtirilgan.

Mintaqada amalga oshirilayotgan eng yirik yangi loyihalar qatoriga Qirg‘izistonda quvvati 1860 MVt bo‘lgan Qambar-Ota GES-1 va Tojikistonda 3600 MVt quvvatga ega Rog‘un GESi qurilishi kiradi.

“Bizning hisob-kitoblarga ko‘ra, Markaziy Osiyo dunyodagi gidroenergetika salohiyatining 25 foizdan kamrog‘i rivojlangan sanoqli hududlardan biridir. Ayni paytda mintaqada 80 dan ortiq GES mavjud bo‘lib, ularning umumiy o‘rnatilgan quvvati qariyb 14 ming MVtni tashkil etadi”, deydi Nikolay Podguzov.

Bank yaqin 3 yilda Markaziy Osiyo suv-energetika kompleksini rivojlantirishga 400 million dollardan ortiq sarmoya kiritadi.

Joriy yilda Yevropa taraqqiyot banki Qirg‘izistonda 100 MVt quvvatga ega Qulanak GESi qurilishini moliyalashtirishni boshladi va boshqa gidroenergetika loyihalarini, jumladan Markaziy Osiyodagi  eng yirik GESlarni – Qambar-Ota va Rog‘un GESini moliyalashtirish bo‘yicha muzokaralar olib bormoqda.