“Vest Xem” 43 yil deganda sovrin yutdi

Angliyaning “Vest Xem” klubi Yevropa Konferensiyalar Ligasi finalida Italiyaning “Fiorentina” klubi ustidan 2:1 hisobida ustun keldi va Yevropa Ligasiga yo‘llanmani qo‘lga kiritdi.

Kecha, 7 iyun kuni 17363 tomoshabinni sig‘dirgan “Fortuna Arena” stadionida bo‘lib o‘tgan final uchrashuvning birinchi bo‘limida 0:0 hisobi qayd etildi. Ikkinchi bo‘limning 62-daqiqasida esa inglizlar penalti ishladi va Said Benrahma penaltini golga aylantirdi. 

Oradan 5 daqiqa o‘tib, Jakomo Bonaventura hisobni tenglashtirdi. “Vest Xem” 90-daqiqada g‘alaba golini urib, Konferensiyalar Ligasi g‘olibiga aylandi. G‘alaba golini kiritgan Djarrod Bouen 1980 yildan so‘ng “bolg‘achilar”ga sovrin yutish imkoniyatini berdi. 

Ma’lumot uchun, ingliz jamoasi ushbu turnirda g‘olib bo‘lgan ikkinchi klubga aylandi. 2021/2022 yilgi mavsumda “Roma” Konferensiyalar Ligasining ilk chempioni bo‘lgandi.

Muhsinjon Umurzoqov