Venesuelada saylov natijalari e’lon qilingach, norozilik namoyishlari boshlandi (video)

Kecha, 29 iyul kuni amaldagi Prezident Nikolas Maduroning prezidentlik saylovlarida g‘alaba qozongani e’lon qilinganidan keyin Venesuelada namoyishchilar butun mamlakat bo‘ylab shahar ko‘chalarida, shuningdek, Milliy saylov organlarining ofislarida to‘plandi.

Yarim tundan so‘ng Maduro 51% ovoz bilan g‘alaba qozonganini xabar qilindi. Ammo batafsil natijalar keltirilmadi. Rasmiy ma’lumotlarga ko‘ra, uning raqibi Edmundo Gonsales 44,2 foiz ovoz to‘plagan.

Muxolifat yetakchilari va xorijlik kuzatuvchilar Venesuelani mustaqil so‘rovchilar mantiqsiz deb atagan saylov natijalari tafsilotlarini oshkor qilishga chaqirdi. Mustaqil eksit-poll natijalari muxolifat va uning nomzodi g‘alaba qozonganini ko‘rsatdi.

Venesuela poytaxti Karakasda politsiya namoyishchilarni tarqatib yuborish uchun ko‘zdan yosh oqizuvchi gaz ishlatdi. Falkon shtatining markazi Koro shahrida namoyishchilar Maduroning ustozi, marhum prezident Ugo Chaves tasviri tushirilgan haykalni buzib tashlashdi.

Avvalroq Karakas va boshqa joylarda saylov uchastkalarida muxolifat tarafdorlari va Maduro o‘rtasida to‘qnashuvlar kelib chiqqan edi. Vashington va boshqa davlatlar hukumatlari natijalarni shubha ostiga qo‘ydi va ovozlarni to‘liq sanab chiqishni talab qildi.

AQSH Davlat kotibi Entoni Blinkenning aytishicha, Vashington rasmiy natijalar xalq irodasini aks ettirmasligidan jiddiy xavotirda.

“Biz hozirgina Venesuela saylov komissiyasining bayonoti bilan tanishdik. E’lon qilingan natija Venesuela xalqining irodasi yoki ovozini aks ettirmasligidan jiddiy xavotirdamiz. Har bir ovoz adolatli va oshkora hisoblanishi, saylov organlari muxolifat va mustaqil kuzatuvchilar bilan zudlik bilan va kechiktirmasdan axborot almashishi, saylov organlari ovoz berish natijalarini e’lon qilishi juda muhim. Xalqaro hamjamiyat buni diqqat bilan kuzatmoqda va shunga mos ravishda javob qaytaradi”, deydi Blinken.

Ovoz berish haqida anonimlik sharti bilan jurnalistlar bilan gaplashgan Bayden ma’muriyati rasmiylari hukumatni “saylovni manipulyatsiya qilishda” aybladi. Ular hech qanday yangi jazo choralarini e’lon qilmadi, lekin qo‘shimcha sanksiyalar uchun eshikni ochiq qoldirdi.

Braziliya va Yevropa Ittifoqi ham ovoz berish ma’lumotlarining shaffofligini ta’minlashga chaqirdi, Rossiya, Kuba, Gonduras va Boliviya esa Maduroning taxminiy g‘alabasini olqishladi.