Venesuelada mahbuslar qamoqxonani egallab, isyon ko‘tardi (video)

Venesuelaning Barinas shtatidagi INJUBA qamoqxonasida mahbuslar jazoni ijro etish muassasasini egallab olib, ommaviy norozilik boshladi. Bu haqda Venesuela qamoqxonalarini monitoring qilish markazi ma’lum qildi.

Ma’lumotlarga ko‘ra, 24 may kuni mahbuslar qamoqxona hududi ustidan nazoratni qo‘lga olgan. Norozilik aksiyasiga 1,2 mingdan ortiq erkak va 100 dan ziyod ayol mahbus qo‘shilgan.

Nodavlat tashkilot bayonotiga ko‘ra, isyonga bir hafta avval qamoqxonaga yangi direktor etib tayinlangan Elvis Makuare Gerrero sabab bo‘lgan.

Mahbuslar uning tayinlanishidan keyin shafqatsiz tintuvlar, kaltaklash va qiynoqlarga duch kelganini bildirgan. Shuningdek, 120 dan ortiq mahbus izolyatorga joylashtirilgani aytilmoqda.

Tashkilotning ma’lum qilishicha, mahbuslarning bir qismi qamoqxona minoralari tomiga chiqqan, ayrimlari esa norozilik sifatida matraslarga o‘t qo‘ygan.

Guvohlarning aytishicha, qamoqxona qo‘riqchilari va yangi direktor namoyish qilayotgan mahbuslarga qarata o‘q uzgan. Oqibatda yaralanganlar borligi aytilmoqda.

Shuningdek, mahbuslar qarindoshlari National Guard of Venezuela bo‘linmalarining qamoqxonaga kirishiga to‘sqinlik qilishga uringan, biroq buning uddasidan chiqa olmagan.

Kuch ishlatar tizimi hududga kirganidan keyin otishmalar va portlashlar ovozi eshitilgani, ayollar korpusiga qarshi ko‘zdan yosh oqizuvchi gaz qo‘llangani ham xabar qilingan.

Venesuela rasmiylari Barinasdagi vaziyat yuzasidan hozircha rasmiy izoh bermagan.

Eslatib o‘tamiz, avvalroq AQSH Prezidenti Donald Tramp Venesuela uning aralashuvidan keyin “baxtli davlat”ga aylanganini aytgandi. Uning so‘zlariga ko‘ra, 2026 yil yanvarida Nikolas Maduro hibsga olinganidan keyin vaziyat keskin yaxshilangan.