O‘zPFL yangi mavsum taqvimi bilan bog‘liq muammolardan qanday chiqmoqchi?

7 fevral kuni futbol bo‘yicha O‘zbekiston chempionatining yangi mavsumiga qur’a tashlandi. Superliga o‘yinlari 3 mart kuni start oladi. Bugun, 8 fevral kuni 2023 yilgi mavsumning dastlabki uch turi sanalari e’lon qilindi. Bu haqda O‘zPFL matbuot xizmati xabar berdi.

Mart oyining 20-28 sanalari FIFA kunlari sifatida belgilab olingan. O‘zbekiston milliy va olimpiya terma jamoalari FIFA kunlari doirasida xalqaro safar o‘yinlarida ishtirok etadi. Qolaversa, 1-18 mart kunlari O‘zbekistonning 4 ta stadioni U-20 Osiyo kubogiga mezbonlik qiladi. Sir emaski, yana 4 ta stadion ta’mirlash ishlari sabab mavsumga tayyor emas. 

Shuning uchun ham O‘FA O‘zPFLga taqvim masalasida iltimos bilan chiqqan. Unga ko‘ra:

- milliy terma jamoaga futbolchi beradigan uch asosiy klub: “Paxtakor”, “Nasaf” va “Navbahor”ning 3-turdagi o‘yinlari 17 mart sanasiga qo‘yilishi kerak;
- Marokashga yo‘l olayotgan olimpiya termasining rejasidan kelib chiqib, “Olimpik” ishtirokidagi o‘yin ham iloji boricha ertaroq o‘tishi kerak. 

Superliga o‘yinlari futbol muxlislariga qulaylik qilish maqsadida juma, shanba va yakshanba kunlariga reja qilingan. Bunda FIFA kunlari inobatga olingan. Qo‘shimchasiga, Liga 18 mart kuni Toshkentda o‘yin tashkil qila olmaydi. Shu kuni U-20 Osiyo chempionatining so‘nggi ikki uchrashuvi bo‘lib o‘tadi. 

Barcha holatlarni inobatga olib, Liga dastlabki uch turning faqatgina 4 ta o‘yinida o‘zgarishlar qildi. Bu haqda qur’a oldidan futbol jamoatchiligiga ham aytib o‘tilgandi. Demak: 

- 1-tur doirasida safarda o‘ynashi kerak bo‘lgan “Nasaf” va “Surxon” jamoalari nominal mezbonga aylanadi (ularning raqibi bo‘lgan “Andijon” va AGMK uy uchrashuvlarini o‘tkazadigan stadion xalqaro musobaqa bilan band);
- 2-tur doirasidagi “Bunyodkor” — AGMK o‘yini keyinroq o‘tkaziladi (Katanets milliy termaga chaqiruv olgan futbolchilar ro‘yxatini e’lon qilishiga qarab mazkur bellashuv yo FIFA kunida yoki aprel oyidagi bo‘sh kunlardan birida bo‘lib o‘tadi);
- 3-tur doirasidagi safarda o‘ynashi kerak bo‘lgan “Olimpik” nominal mezbonga aylanadi (o‘yin “Jar” stadionida o‘tadi). 

Bugun Liga keyingi turlar masalasiga ham oydinlik kiritadi.