O‘zini lordning xotini qilib ko‘rsatgan oqsoch qimmatbaho buyumlarni o‘mardi

Rossiyaning Moskva shahri Zamoskvoretskiy sudi qimmatbaho soatlar va pul mablag‘larini o‘g‘irlash, shuningdek, firibgarlikda ayblanayotgan xizmatkor ayol Lyudmila Farmerni 5 yilga ozodlikdan hukm qildi. Bu haqda TASS tanishgan sud hujjatlarida keltirilgan.

“Farmer Lyudmila Viktorovna Rossiya Federatsiyasi Jinoyat kodeksining 159-moddasi 1-qismi (ishonchni suiiste’mol qilish orqali firibgarlik) va 158-moddasi 4-qismi “b” bandida (o‘ta yirik hajmdagi o‘g‘rilik) nazarda tutilgan jinoyatlarni sodir etganlikda aybdor deb topilsin va jinoyatlar majmui bo‘yicha jazolarni qisman qo‘shish orqali unga jarima bilan birga umumiy tartibli axloq tuzatish koloniyasida 5 yil muddatga ozodlikdan mahrum qilish jazosi tayinlansin”, deyiladi hujjatda.

Apellyatsiya instansiyasi sudi Farmerni da’vo muddati o‘tganligi sababli firibgarlik uchun berilgan jazodan ozod qilgan va hukmdan jinoyatlar majmui bo‘yicha jazo tayinlash haqidagi ko‘rsatmani chiqarib tashlagan, biroq hukmning qolgan qismi o‘zgarishsiz qoldirilgan.

Sudning aniqlashicha, Farmer Moskvadagi o‘sha paytda ta’mirlanayotgan ikki qavatli xonadonni tozalash uchun xizmatkor sifatida ishga yollangan. Uy egalari ta’tilga ketgan, Farmer esa uyga kirish imkoniga ega bo‘lib, xonadonni tozalashi, ayrim maishiy masalalarni nazorat qilishi va messenjer orqali uy bekasi bilan aloqada bo‘lib turishi kerak edi. Jabrlanuvchi bilan tanishayotganda Farmer Buyuk Britaniyada doimiy yashash huquqiga ega ekanligi, turmush o‘rtog‘i bilan dunyo bo‘ylab sayohat qilgani, erining bankda ishlashi haqida gapirib bergan va o‘zini interer dizayneri sifatida tanishtirgan.

2023 yilning avgust oyida uy egalarining yo‘qligi va o‘z harakatlari nazorat qilinmayotganidan foydalanib, Farmer yotoqxonadan yashirincha bir nechta qimmatbaho qo‘l soatlarini, jumladan, Rolex, Cartier va Audemars Piguet brendlarini, shuningdek, pul mablag‘larini o‘g‘irlagan. U mulkning bir qismini lombard orqali tasarruf etgan: u yerda 800 ming rubl kredit garovi evaziga Rolex Submariner soati, 200 ming rubl kredit garovi evaziga Cartier soati hamda 250 ming rubl kredit garovi evaziga yana bir Rolex soati qabul qilingan. Shuningdek, Farmerdan 900 ming rubl kredit garovi evaziga Audemars Piguet soati ham qabul qilingan. Lombard xodimasining sudga ma’lum qilishicha, Farmer soatlarni topshirayotganda ularni o‘zi va vafot etgan eri – Buyuk Britaniya fuqarosining shaxsiy mulki sifatida taqdim etgan va o‘zini sobiq lordning xotini ekanligini da’vo qilgan.

Bundan tashqari, Moskvaning Zamoskvoretskiy sudi Farmerni firibgarlikda ham aybdor deb topgan. 2023 yil avgust oyi oxirida u messenjer orqali uy bekasiga go‘yoki xonadonda bo‘lib, tozalash ishlarini bajarayotgandek taassurot qoldiruvchi xabarlar yuborib turgan. Ushbu xabarlar asosida jabrlanuvchi unga ish haqini o‘tkazib bergan, biroq sud o‘sha kunlari Farmer aslida ish joyida bo‘lmagani va ish bajarmaganini aniqlagan.

Sudlanuvchi o‘z aybini tan olmagan. U mulkni o‘g‘irlamaganini, balki qimmatbaho soatlar va zargarlik buyumlarini go‘yoki uy bekasining iltimosiga binoan lombardga topshirganini da’vo qilgan. Shuningdek, u ish haqini haqiqatda ishlagan vaqti uchun olganini, jumladan, uning so‘zlariga ko‘ra, boshqa vaqtda ishlab berish orqali qoplangan kunlar uchun to‘langanini bildirgan.