AQSHda O‘zbekiston fuqarosi 12 mln dollarlik yuklarni o‘g‘irlashda ayblanyapti

O‘zbekistonlik erkak AQSHda 12 mln dollarlik yukni o‘g‘irlaganlikda ayblanyapti. Mazkur ayblov bo‘yicha ish kecha, 21 oktyabr kuni AQSHning Brijport federal sudida ko‘rib chiqildi. Sudda erkak aybiga iqror bo‘lmadi. Bu haqda “Fox61” xabar berdi.

Qayd etilishicha, joriy yilning 22 sentyabr kuni Nyu-Xeyvendagi federal katta sudyalar hay’ati 33 yoshli Nursulton Izzatulloyevich Haydarovga nisbatan ayblov xulosasini chiqargan. Agar u til biriktirish ayblovi bo‘yicha aybli deb topilsa, 5 yilgacha ozodlikdan mahrum etilishi mumkin. Konnektikut okrugi bo‘yicha AQSH prokurorining hisobotida Haydarov ishtirok etganlikda gumonlanayotgan jinoiy til biriktirish tafsilotlari bayon qilingan.

Sud hujjatlari va bayonotlari Milliy xavfsizlik bo‘yicha tezkor guruh Kaliforniya va boshqa shtatlardagi joylardan sodir etilgan bir qator yuk o‘g‘riliklarini surishtirayotganini ko‘rsatadi.

Tergovchilarning bildirishicha, 2025 yilning sentyabr oyidan beri Haydarov va uning ehtimoliy jinoyatchi sheriklari bir nechta avtotransport tashuvchi kompaniyalarni sotib olgan yoki boshqacha tarzda nazorat ostiga olgan.

Shundan so‘ng, ular ushbu korxonalarning AQSH Transport vazirligi raqamlari (USDOT), avtotransport tashuvchisining identifikatsiya raqamlari (MC), elektron pochta hisoblari va egalarining shaxsiy ma’lumotlarini o‘zlashtirib olgan.

Prokurorlar ushbu shaxslarni avvalgi biznes egalari nomidan ish ko‘rganlikda va shtatlararo yuk tashish bo‘yicha shartnomalarni qo‘lga kiritish uchun mavjud korxonalarning obro‘si hamda ishonchidan foydalanganlikda ayblamoqda. Shtatlararo yuk tashish bo‘yicha yuk brokeri bilan shartnoma tuzilgandan so‘ng, haydovchi yukni tarqatish markazidan olib ketgan.

Shunga qaramay, hisobotda qayd etilishicha, ko‘plab yuklar hech qachon manzilga yetkazilmagan va o‘g‘irlangan deb xabar qilingan. Ba’zi hollarda jinoyatchilikda gumonlanayotgan shaxslar o‘g‘irlangan tovarlarni qaytarish evaziga hatto tovon puli ham talab qilgan.

Ayblov xulosasiga ko‘ra, Haydarov AQSHda qonuniy doimiy yashovchi (Green Card egasi) maqomiga hamda Nyu-Jersi shtatining haqiqiy tijorat haydovchilik guvohnomasiga ega bo‘lgan.

Shuningdek, u “Sayid Maxmudarov”, “Rustam Mavlonov”, “Dmitriy Aganin”, “Roman Smirov” va “Qayrat Nurtas” nomlariga berilgan soxta haydovchilik guvohnomalariga ega bo‘lgani aytilmoqda.

Prokurorlarning bildirishicha, ushbu shaxsni tasdiqlovchi hujjatlarning har birida haydarovning yuz tuzilishi o‘zgartirilgan fotosurati joylashtirilgan. Yakuniy ayblovga ko‘ra, ushbu jinoiy fitna kamida 24 ta yukni o‘g‘irlashni o‘z ichiga olgan.

Ushbu yuklar orasida qattiq disklar (hard drive), stereo-uskunalar, kiyim-kechak, elektronika, kompyuter uskunalari, oziq-ovqat mahsulotlari, nikotin mahsulotlari va boshqa qimmatbaho buyumlar bo‘lgan. Yuqorida ta’kidlanganidek, hisobotda aynan Haydarov ishtirok etgani aytilgan o‘g‘riliklardan yetkazilgan zararning taxminiy qiymati 12 million dollardan ortiqni tashkil etadi.

Haydarov 1 iyun kuni Ontarioda (Kaliforniya shtati) federal jinoiy shikoyat asosida hibsga olingan. U hibsga olinganidan beri ushlab turilgan va kecha, 21 oktyabr kuni sudda hozir bo‘lish uchun Brijportga olib borilgan.

Prokurorlar Haydarovning aybi sudda to‘liq isbotlanmaguncha u aybsiz deb hisoblanishini bildirgan.

Ushbu faol jinoyat ishi Federal qidiruv byurosi (FQB) tomonidan, AQSH Transport vazirligining Bosh inspektor ofisi, Ichki daromadlar xizmatining Jinoyatlarni tergov qilish bo‘limi, Milliy xavfsizlik tergovlari va Kaliforniya shtatining Fullerton hamda Ontario politsiya boshqarmalari ko‘magida olib borilmoqda.

Eslatib o‘tamiz, avvalroq o‘zini mafiya a’zolaridek tutishga urinib, AQSHning shimoli-sharqiy qismidagi omborxonalardan 4,5 million dollarlik qimmatbaho pishloqlar, sigaretalar va boshqa tovarlarni o‘g‘irlagan bir guruh o‘zbekistonliklar qo‘lga olingandi.