O‘zbekistonning qator elchixonalarida yangi lavozim joriy qilinadi

O‘zbekistonning bir necha xorij mamalakatidagi elchixonalarida transport masalalari bo‘yicha maslahatchi lavozimi joriy etiladi. Bu Prezident Shavkat Mirziyoyev tomonidan imzolangan “Ma’muriy islohotlar doirasida transport sohasida davlat boshqaruvini samarali tashkil qilish chora-tadbirlari to‘g‘risida”gi Farmonida nazarda tutilgan.

Keltirilishicha, mazkur lavozim dastlab O‘zbekistonning Xitoy Xalq Respublikasi, Qozog‘iston Respublikasi, Ozarbayjon Respublikasi, Eron Islom Respublikasi va Latviya Respublikasidagi elchixonalarida joriy qilinadi.

Bundan tashqari, farmonga ko‘ra, Transport vazirligi huzurida quyidagilar tashkil etildi:

• transport nazorati inspeksiyasi;
• transport sohasi kadrlarini qayta tayyorlash va malakasini oshirish instituti;

O‘zbekiston Respublikasi tranzit salohiyatini rivojlantirish idoralararo kengashi.

Shuningdek, transport nazorati inspeksiyasi avtomobil, temir yo‘l, suv, elektr transporti, metropoliten va yo‘l xo‘jaligi sohalarida nazorat funksiyalarini amalga oshiruvchi respublika ijro etuvchi hokimiyat organi hisoblanadi.

Transport nazorati inspeksiyasiga o‘z vazifalarini amalga oshirishi uchun quyidagi vakolatlar beriladi:

• avtomobilda yuk va yo‘lovchi tashish, temir yo‘l, suv, elektr transporti, metropoliten hamda yo‘l xo‘jaligi sohasida ma’muriy huquqbuzarliklar to‘g‘risidagi ishlarni ko‘rib chiqish va ma’muriy jazo choralarini qo‘llash;
• avtotransport vositasida yuk va yo‘lovchilar tashish qoidalarining buzilishi vizual kuzatuv yoki maxsus moslama yordamida aniqlanganda, avtotransport vositasini yuk va yo‘lovchi tashishni nazorat qilish bo‘yicha stasionar va mobil postlarda tekshirish uchun to‘xtatish shular jumlasiga kiradi

Shu bilan birga, 2023 yil 1 sentyabrgacha jamoat transportida tashuvlar sifatini yaxshilash va xizmatlar jozibadorligini oshirish hamda sog‘lom raqobat muhitini shakllantirish maqsadida tashuvchilar reytingini joriy etish yuzasidan qaror loyihasi ishlab chiqiladi.