O‘zbekistonga olib o‘tilgan AQSH samolyotlari “Tolibon”ga berilmaydi – Pentagon

Afg‘onistondan O‘zbekiston va Tojikistonga olib o‘tilgan AQSH samolyotlari “Tolibon”ga berilmaydi. Bu haqda AQSH Mudofaa vaziri Matbuot kotibi Jon Kirbi ma’lum qildi. 

Qayd etilishicha, o‘tgan hafta Pentagon rahbari Lloyd Ostin Mudofaa mikroelektronika faoliyatini sanoat texnik mukammalligi markazi sifatida belgilagan. Kirbiga ko‘ra, mikroelektronika ko‘plab asosiy qurol tizimlariga imkon beradi. Matbuot kotibining aytishicha, bu ijobiy qadam hisoblanadi. 

Ta’kidlanishicha, AQSH 2021 yilning avgust oyida Afg‘onistonni tark etganida ayrim afg‘on uchuvchilari mamlakat harbiy-havo kuchlariga tegishli bo‘lgan samolyotda o‘zlari va oilalarini mamlakatdan tashqariga — O‘zbekiston va Tojikistonga olib ketgan. Ular orasida AQSH tomonidan taqdim etilgan samolyotlar ham bo‘lgan. 

Afg‘onistonni bosib olgan “Tolibon” esa ushbu samolyotlarni qaytarib olishni xohlamoqda. AQSH Mudofaa vazirligiga ko‘ra, Amerikada ishlab chiqarilgan samolyotlar haqida gap ketganda, bunday bo‘lishi mumkin emas. 

“Biz hali ham o‘sha vertolyotlarning joylashishini ishlab chiqmoqdamiz. Menimcha, ular Afg‘onistonga “Tolibon” tomonidan qo‘llanilish uchun yuborilmaydi”, degan Kirbi. 

Kirbining so‘zlariga ko‘ra, ushbu vertolyotlar nima qilinishi haqidagi yakuniy qaror ustida Mudofaa vazirligi hali ham ishlamoqda. 

Kirbi hozirda “Tolibon” AQSH tomonidan tan olinmasligini qo‘shimcha qilgan. 

“Biz u yerda nima bo‘layotganini kuzatib boramiz. Bizda terrorizmga qarshi kurashda jiddiy va muhim mas’uliyat bor”, degan Kirbi. 

Eslatib o‘tamiz, Afg‘onistonda hokimiyatni qo‘lga kiritgan “Tolibon” harakati Tojikiston va O‘zbekiston rasmiylarini Markaziy Osiyoning ushbu Respublikalariga olib o‘tilgan samolyotlarni qaytarishga chaqirgandi. 

Ta’kidlanishicha, Afg‘oniston Islom Respublikasi rejimi ag‘darilishidan oldin mamlakatda 164 ta jangovar samolyot bo‘lgan bo‘lsa, hozirda ular atigi 81 ta. Ularning aksariyati mintaqaning boshqa davlatlariga eksport qilingan.  

Ma’lumot o‘rnida, AQSH 2021 yil bahorida o‘z Qurolli kuchlarini mamlakatdan olib chiqib ketishini e’lon qilganidan keyin “Tolibon” harakati Afg‘oniston ustidan nazorat o‘rnatish uchun keng ko‘lamli operatsiya boshladi. 15 avgust kuni “Tolibon” jangsiz Qobulga kirdi, Prezident Ashraf G‘ani esa Respublikani tark etdi. 6 sentyabrda toliblar butun Afg‘oniston hududi ustidan nazorat o‘rnatilgani haqida e’lon qilgan bo‘lsa, 7 sentyabrda esa qonuniyligi hali hech bir davlat tomonidan tan olinmagan muvaqqat hukumat tarkibini e’lon qildi.