O‘zbekistondagi barcha kichik sanoat zonalari inventarizatsiya qilinadi - Prezident qarori

O‘zbekiston Respublikasi Prezidenti Shavkat Mirziyoyev joriy yilning 20 iyun kuni “Kichik sanoat zonalari faoliyatini muvofiqlashtirish va boshqarishni yanada takomillashtirish chora-tadbirlari to‘g‘risida”gi qarorni qabul qildi. Qarorning to‘liq matni bilan quyida tanishishingiz mumkin.

O‘zbekiston Respublikasi Prezidentining 
qarori

Yangi raqobatbardosh ishlab chiqarishlar va kichik korxonalarning rivojlantirilishini davlat tomonidan qo‘llab-quvvatlash bo‘yicha uzluksiz ravishda amalga oshirilayotgan chora-tadbirlar doirasida 150 ta kichik sanoat zonasi tashkil qilingan bo‘lib, ularning hududida har yili jami 1,7 trillion so‘mdan ortiq qiymatdagi mahsulotlar ishlab chiqarish hajmiga ega bo‘lgan 1 691 ta kichik korxona faoliyat yuritadi va 27 mingdan ziyod ish o‘rinlari yaratildi.

Kichik sanoat zonalari faoliyatini muvofiqlashtirish va boshqarish tizimini yanada takomillashtirish, ularning ishtirokchilari uchun faoliyat yuritish sharoitlarini sifat jihatidan yaxshilash va mahsulotlarni sotishga ko‘maklashish, investitsiyalar jalb qilinishini faollashtirish, avvalambor, foydalanilmayotgan, faoliyat yuritmayotgan ishlab chiqarish maydonlari negizida tashkil qilinayotgan importbop mahsulotlarni chiqarish bo‘yicha zamonaviy ishlab chiqarishlarning joriy etilishini jadallashtirish, ushbu asosda yangi turg‘un ish joylari tashkil etilishini ta’minlash va aholi daromadini oshirish maqsadida:

1. O‘zbekiston Respublikasi Iqtisodiyot va sanoat vazirligi hamda Davlat aktivlarini boshqarish agentligining Qoraqalpog‘iston Respublikasi, viloyatlar va Toshkent shahrida davlat muassasasi shaklidagi kichik sanoat zonalarini boshqarish bo‘yicha yagona direksiyalarni (keyingi o‘rinlarda – direksiyalar) har bir kichik sanoat zonasiga direksiyalarning mas’ul xodimlarini biriktirgan holda tashkil etish to‘g‘risidagi taklifiga rozilik berilsin.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bir oy muddatda yangi tashkil qilinayotgan direksiyalarning ro‘yxatdan o‘tkazilishini ta’minlasin.

2. O‘zbekiston Respublikasi Prezidentining 2019 yil 10 yanvardagi “Iqtisodiy rivojlanish sohasida davlat siyosatini amalga oshirish tizimini tubdan takomillashtirish chora-tadbirlari to‘g‘risida”gi PF–5621-son Farmoni bilan kichik sanoat zonalari ishtirokchilariga quyidagi huquqlar berilganligi ma’lumot uchun qabul qilinsin:

o‘z mablag‘lari hisobiga qurilgan binolar va inshootlar (yoki ularning qismlari)ga mulk huquqini belgilangan tartibda rasmiylashtirish;

rekonstruksiya qilish yoki kapital ta’mirlashni o‘z mablag‘lari hisobidan amalga oshirgan taqdirda, biroq kichik sanoat zonasi ishtirokchisi maqomini olgan kundan boshlab kamida 3 yil muddat o‘tgandan keyin, binolar va inshootlar (yoki ularning qismlari)ni xususiylashtirish;

investitsiya va boshqa ijtimoiy majburiyatlarni to‘liq bajargan taqdirda, biroq kichik sanoat zonasi ishtirokchisi maqomini olgan davridan boshlab kamida 5 yil muddat o‘tgandan keyin, o‘zlariga berilgan binolar va inshootlar (yoki ularning qismlari)ni xususiylashtirish. 

3. Belgilab qo‘yilsinki:

a) kichik sanoat zonalari faqatgina transport va muhandislik-kommunikatsiya infratuzilmasi mavjud yoki o‘tkazish oson bo‘lgan faoliyat yuritmayotgan korxonalar negizida va qishloq xo‘jaligiga mo‘ljallanmagan bo‘sh yer maydonlarida tashkil qilinadi;

b) yer uchastkalarini berish, kichik sanoat zonalari hududida amalga oshirish uchun investitsiya loyihalarini tanlash va joylashtirish to‘g‘risidagi qarorlar tuman (shahar) hokimining yer uchastkasini berish to‘g‘risidagi alohida qarorini qabul qilmagan holda Qoraqalpog‘iston Respublikasi, viloyatlar va Toshkent shahrida erkin iqtisodiy zonalar va kichik sanoat zonalarining ma’muriy kengashlari (keyingi o‘rinlarda – ma’muriy kengashlar) bayonnomalari shaklida rasmiylashtiriladi;

v) kichik sanoat zonasi ishtirokchisi tomonidan investitsiya loyihasini kichik sanoat zonasida joylashtirilgan kundan e’tiboran uch oy mobaynida amalga oshirish bo‘yicha chora-tadbirlar ko‘rilmaganligi, shuningdek, ob’ektdan shartnomada ko‘rsatilgan maqsadga nomuvofiq foydalanilganligi shartnomaning bir tomonlama tartibda bekor qilinishiga asos bo‘ladi;

g) kichik sanoat zonasi ishtirokchisi tomonidan investitsiya loyihasini amalga oshirish ob’ektiv sabablarga ko‘ra shartnomada ko‘rsatilgan muddatlarda yakunlanmagan bo‘lsa yoki oxirgi 6 oy mobaynida ishlab chiqarish faoliyati amalga oshirilmagan bo‘lsa, ma’muriy kengash unga loyiha amalga oshirilishini tezlashtirish bo‘yicha “yo‘l xaritasi”ni tasdiqlagan holda qo‘shimcha muddat taqdim etilishi yoxud shartnoma bekor qilinishi to‘g‘risidagi masalani ko‘rib chiqishi mumkin;

d) binolar va inshootlar (yoki ularning qismlari)ni xususiylashtirish quyidagi tartibda amalga oshiriladi:

o‘z mablag‘lari hisobiga rekonstruksiya qilish yoki kapital ta’mirlash ishlari olib borilgan binolar va inshootlar (yoki ularning qismlari)da, biroq kichik sanoat zonasi ishtirokchisi maqomini olgan kundan boshlab kamida 3 yil muddat o‘tgandan keyin – rekonstruksiya qilish yoki kapital ta’mirlash ishlarining xarajatlari chegirib tashlangan holda belgilangan tartibda aniqlanadigan baholash qiymati bo‘yicha;

investitsiya va boshqa ijtimoiy majburiyatlarni to‘liq bajargan taqdirda (ishtirokchining shaxsiy mablag‘lari hisobiga rekonstruksiya qilish yoki kapital ta’mirlash ishlari olib bormagan holda), biroq kichik sanoat zonasi ishtirokchisi maqomini olgan kundan boshlab kamida 5 yil muddat o‘tgandan keyin – besh yil mobaynida teng ulushlarda to‘lovlarni kiritish huquqi berilgan holda belgilangan tartibda aniqlanadigan baholash qiymati bo‘yicha.

4. O‘zbekiston Respublikasi Iqtisodiyot va sanoat vazirligi:

a) ma’muriy kengashlar va direksiyalar bilan birgalikda uch oy muddatda:

respublikaning barcha hududlaridagi kichik sanoat zonalarini inventarizatsiya qilish va ularning faoliyatini o‘rganish hamda natijasi bo‘yicha ularning har biri keyinchalik faoliyat yuritishi maqsadga muvofiqligi haqida Vazirlar Mahkamasiga takliflar kiritilishini;

kichik sanoat zonalari ishtirokchilari bilan tuzilgan binolar va inshootlarning ijarasi to‘g‘risidagi shartnomalarni, zarur hollarda, belgilangan tartibda foydalanilmayotgan va maqsadga nomuvofiq foydalanilayotgan binolar va inshootlarni qaytarish chora-tadbirlarini ko‘rgan holda yoki qo‘shimcha loyihalarni joylashtirish hisobiga ulardan oqilona foydalanish bo‘yicha “yo‘l xaritalari”ni ishlab chiqqan holda qayta ko‘rib chiqilishini;

belgilangan muddatlarda investitsiya loyihalarining amalga oshirilishi boshlanishini ta’minlamagan kichik sanoat zonalari ishtirokchilari bilan investitsiyalash to‘g‘risidagi bitimlarning bekor qilinishini;

ishlab chiqarishning qisqa muddatlarda foydalanishga topshirilishini ko‘zda tutgan holda orqada qolayotgan loyihalar bo‘yicha tarmoq jadvallarining ishlab chiqilishini ta’minlasin;

b) Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda ikki hafta muddatda ijtimoiy-iqtisodiy rivojlanishi orqada qolayotgan tumanlar va shaharlarda hududning salohiyati, raqobatdagi ustuvor yo‘nalishlari, tabiiy va mehnat resurslaridan kelib chiqib, ularning ixtisoslashuvini belgilagan holda yangi kichik sanoat zonalarini tashkil qilish bo‘yicha takliflarni Vazirlar Mahkamasiga kiritsin;

v) O‘zbekiston Respublikasi Uy-joy kommunal xizmat ko‘rsatish vazirligi, Transport vazirligi, Energetika vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda uch oy muddatda yangi tashkil qilinayotgan kichik sanoat zonalari hududlarida talab yuqori bo‘lgan mahsulotlar ishlab chiqarilishini yo‘lga qo‘yish uchun zarur shart-sharoitlar yaratilishini nazarda tutgan holda hududlar kesimida transport va muhandislik-kommunikatsiya infratuzilmasini jadal rivojlantirish bo‘yicha “yo‘l xaritasi”ni tasdiqlash uchun Vazirlar Mahkamasiga kiritsin;

g) ommaviy axborot vositalari, shu jumladan, elektron va internet nashrlarini jalb qilgan holda mamlakatning kichik sanoat zonalari, investitsiya kiritishning afzalliklari va yaratilayotgan imtiyozli sharoitlar, kichik sanoat zonalari hududlaridagi mavjud bo‘lgan infratuzilma, taklif qilinayotgan xizmatlar, shuningdek, amalga oshirilishi tavsiya etilayotgan investitsiya loyihalari to‘g‘risidagi batafsil ma’lumotlarning doimiy asosda nashr etilishini tashkil etsin.

5. Belgilab qo‘yilsinki:

ma’muriy kengashlar kotibining kichik sanoat zonalari faoliyatini boshqarish va muvofiqlashtirishga oid funksiyalari Qoraqalpog‘iston Respublikasi iqtisodiyot va sanoat vaziri, viloyatlar va Toshkent shahar iqtisodiyot va sanoat bosh boshqarmalari boshliqlari zimmasiga yuklatiladi;

direksiyalar direktorlarini lavozimga tayinlash va lavozimidan ozod etish ma’muriy kengashlar tomonidan O‘zbekiston Respublikasi Iqtisodiyot va sanoat vazirligi bilan kelishilgan holda amalga oshiriladi;

kichik sanoat zonalarining arxitektura-rejalashtirish hujjatlarini ishlab chiqish, shu jumladan, yer uchastkalarini tanlash va ajratish bo‘yicha materiallarni tayyorlash Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan Qoraqalpog‘iston Respublikasining byudjeti hamda viloyatlar va Toshkent shahar mahalliy byudjetlari mablag‘lari hisobiga loyiha tashkilotlarini jalb qilgan holda ta’minlanadi;

direksiyalar kichik sanoat zonalari hududlarining arxitektura-rejalashtirish loyihalarini ishlab chiqish bo‘yicha buyurtmachilar bo‘lib qatnashishga haqli.

6. Kichik sanoat zonalari direksiyalari 2022 yil 1 iyulga qadar yer solig‘i va mol-mulk solig‘i to‘lashdan ozod etilsin.

7. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi Iqtisodiyot va sanoat vazirligi bilan birgalikda uch oy muddatda kichik sanoat zonalari hududlarida amalga oshirilayotgan investitsiya loyihalarini monitoring qilishning avtomatlashtirilgan tizimini joriy etsin.

8. O‘zbekiston Respublikasi Energetika vazirligi, Uy-joy kommunal xizmat ko‘rsatish vazirligi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda Qoraqalpog‘iston Respublikasi byudjeti, viloyatlar va Toshkent shahrining tegishli mahalliy byudjetlari mablag‘lari hisobiga kichik sanoat zonalarining bo‘linish chegarasigacha zaruriy tashqi muhandislik kommunikatsiyalari va infratuzilmasining kichik sanoat zonalarida tadbirkorlik sub’ektlarini joylashtirishga oid ishlab chiqilgan loyihalarga binoan qurilishini va modernizatsiya qilinishini ta’minlasin.

9. Quyidagilarga:

O‘zbekiston Respublikasi Bosh vazirining o‘rinbosari – moliya vaziri J.A.Qo‘chqorovga – ushbu qaror bilan qo‘yilgan vazifalarning so‘zsiz bajarilishini ta’minlash doirasida vazirlik va idoralar faoliyatini samarali muvofiqlashtirish uchun;

O‘zbekiston Respublikasi iqtisodiyot va sanoat vaziri B.A.Xodjayevga – ma’muriy kengashlar tomonidan kichik sanoat zonalari hududida ishlab chiqarishlarni joylashtirishga investitsiya talabnomalarining o‘z vaqtida ko‘rib chiqilishi hamda ular bo‘yicha qarorlar qabul qilinishi, shuningdek, kichik sanoat zonalarining salohiyatidan samarali foydalanilishi, loyihalarning o‘z vaqtida amalga oshirilishi va joriy etilishi uchun;

O‘zbekiston Respublikasi energetika vaziri A.S.Sultanovga, Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlariga– qurilishning o‘z vaqtida tugatilishi, modernizatsiya va kichik sanoat zonalari ishtirokchilarini tashqi muhandislik kommunikatsiyalari va infratuzilmaga ulanishi, ularning ob’ektlari real ishlab chiqarish ehtiyojlariga muvofiq elektr energiyasi va tabiiy gaz bilan uzluksiz ta’minlanishi uchun shaxsiy javobgarlik yuklatilsin.

10. O‘zbekiston Respublikasi Iqtisodiyot va sanoat vazirligi ikki
oy muddatda Vazirlar Mahkamasiga:
ushbu qaror talablarini hisobga olgan holda Kichik sanoat zonalari to‘g‘risida yangilangan nizom loyihasini;

qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida takliflar kiritsin.

11. Mazkur qarorning ijrosini nazorat qilish O‘zbekiston Respublikasi Bosh vazirining o‘rinbosari – moliya vaziri J.A.Qo‘chqorov va O‘zbekiston Respublikasi Prezidenti maslahatchisining o‘rinbosari G.K.Saidova zimmasiga yuklansin.

O‘zbekiston Respublikasi 
Shavkat Mirziyoyev

Toshkent shahri
2019 yil 20 iyun