O‘zbekistonda aprel oyida narx-navo qanchalik o‘zgargan?

Joriy yilning aprel oyida tovarlar va xizmatlarning iste’mol narxlari o‘rtacha 0,9%ga ko‘tarilgan.

Davlat statistika qo‘mitasi xabariga ko‘ra, umumiy hisobda 2019 yilning yanvar-aprel oylari davomida iste’mol bozoridagi tovarlar va xizmatlar narxlari 5,3%ga qimmatlashdi. 2018 yilning aprel oyiga nisbatan respublika iste’mol sektoridagi o‘rtacha narxlar 13,7%ga oshdi. 

2019 yilning aprelida tovarlar oy davomida 1,0%, jumladan oziq-ovqat mahsulotlari 1,0%, nooziq-ovqat mahsulotlari 1,1%ga qimmatlashdi. Xizmatlar narxlari esa 0,6%ga oshdi. 

Umumiy hisobda 2019 yilning yanvar-aprel oylari davomida oziq-ovqat mahsulotlari 7,4%, nooziq-ovqat mahsulotlari 3,9%, xizmatlar 3,1%ga qimmatlashdi. 

Yil davomida (2019 yil aprel oyi 2018 yilning aprel oyiga nisbatan) oziq-ovqat mahsulotlari narxlari 16,0%, nooziq-ovqat mahsulotlari 11,1%, xizmatlar 13,3%ga ko‘tarildi. 

2019 yilning aprel oyida har bir yirik guruhning salmoq vaznlarini inobatga olgan holdagi umumiy iste’mol narxlari indeksiga tovarlar narxlari o‘zgarishi katta ta’sir ko‘rsatib (0,8 foiz darajasida, keyingi o‘rinlarda f.d.), bu vaqtda xizmatlar ta’siri 0,1 f.dni tashkil etgan. 

Oziq-ovqat mahsulotlaridan narxlarning o‘sishi borasidagi yetakchilik so‘nggi ikki oy davomida meva-sabzavot hamda sut mahsulotlari guruhiga tegishli bo‘lib qolmoqda (narxlar mos ravishda 2,4% va 1,1%ga qimmatlashgan). 

2019 yilning mart oyida mevalar, sabzavotlar va kartoshka narxlari 4,5%, sut mahsulotlari 1,5%ga qimmatlashgan. Tuxum narxlari esa ketma-ket uch oy davomida arzonlashib bormoqda (fevralda 0,2%, mart oyida 1,2%, aprelda 3,1%). 

Umumiy hisobda, 2019 yilning yanvar-aprel oylari davomida narxlarning o‘sishi bo‘yicha yetakchi uchlikni meva-sabzavot (20,5%), sut mahsulotlari (9,3%) va umumiy ovqatlanish (8,8%) narxlari band etgan. 

2018 yilning oxiriga nisbatan mevalar 27,8%, sabzavotlar 16,2%, kartoshka 7,9%ga qimmatlashgan. Oy davomida meva-sabzavot mahsulotlaridan karam (20,1%), piyoz (17,3%), uzum (15,7%), oshqovoq (15,5%), sabzi (8,5%), kartoshka (6,6%) narxlari sezilarli darajada qimmatlashdi. Shu bilan bir qatorda bodring narxlari 46,6%ga arzonlashdi.  

2018 yilning dekabr oyiga nisbatan narxlarning o‘sishi borasida yetakchi o‘rinlar uzum (1,7 baravar), tarvuz va karam (1,5 baravar), pomidor, qovun va qovoq (1,4 baravar) mahsulotlari narxlariga tegishlidir. Shu bilan bir qatorda 2019 yilning to‘rt oyi davomida bording sezilarli darajada arzonlashdi (38,8%). 

Yillik natijalarga ko‘ra, karam (3,1 baravar), sabzi (2,3 baravar), lavlagi (1,4 baravar), tarvuz, qovun va oshqovoq (1,3 baravar) narxlari boshqa turdagi mahsulotlarga nisbatan bir muncha yuqori darajada qimmatlashdi. Shu bilan bir qatorda, 2018 yilning aprel oyiga nisbatan sarimsoq (35,1%), olma (23,0%), kartoshka (20,4%), bodring (15,4%), pomidor (12,3%) va banan (0,1%) narxlari arzonlashganligi qayd etildi, deyiladi Davstatqo‘m xabarida.