O‘zbekistonda ham elektron sigaretalar taqiqlanishi mumkin

O‘zbekistonda ayrim turdagi tamaki mahsulotlarining, tamakini hamda nikotinni iste’mol qilish moslamalarining, shu jumladan, elektron sigaretalarni ishlab chiqarish, tayyorlash, o‘tkazish maqsadida ularni saqlash, tashish yoki o‘tkazish taqiqlanishi mumkin. Bu haqda Oliy Majlis muhokamasiga kiritilgan “O‘zbekiston Respublikasining ayrim qonun hujjatlariga ba’zi turdagi tamaki mahsulotlarining tamakini hamda nikotinni iste’mol qilish moslamalarining, shu jumladan elektron sigaretalarning muomalasini taqiqlash hamda javobgarlik belgilashga qaratilgan o‘zgartirishlar va qo‘shimcha kiritish to‘g‘risida”gi qonun loyihasida keltirilgan.

Qonun loyihasi tashabbuskorlariga ko‘ra, so‘nggi yillarda tamaki va nikotin mahsulotlarining “zamonaviy” va “innovatsion” turlari, xususan, nikotinni yetkazib berish moslamalari, elektron sigaretalar va ular uchun suyuqliklar hamda qizdiriladigan tamaki mahsulotlarining respublikaga qonunga xilof ravishda olib kirish holatlari va aylanmasi ortib bormoqda. Bundan tashqari, ushbu mahsulotlarni aholi, ayniqsa, yoshlar orasida iste’mol qilish holatlari ko‘paygan.

Ushbu qonun loyihasi bilan elektron sigaretalarni O‘zbekiston hududiga olib kirish yoki olib chiqishga nisbatan ta’sirchan chora sifatida ma’muriy va jinoiy javobgarlik belgilanishini nazarda tutilgan.

Eslatib o‘tamiz, qo‘shni Qozog‘istonda elektron sigaretalarni olib kirish, ularni sotish va turli tamaki mahsulotlarni reklama qilishni taqiqlovchi qonun 2024 yil 20 iyundan kuchga kirgandi. Noyabr oyida esa Qirg‘iziston Prezidenti Sadir Japarov tamaki mahsulotlari va nikotin moddalarining zararli ta’siridan aholining sog‘lig‘ini himoya qilish bo‘yicha choralarni kuchaytirishga qaratilgan qonunni imzolagandi. Ushbu qonun 2024 yil 23 oktyabrda Jogorku Kenesh tomonidan qabul qilingan bo‘lib, mamlakat hududiga elektron sigaretlarni olib kirishni, sotish va foydalanishni taqiqlaydi.