O‘zbekiston “Jinoyatlar indeksi”da 14 pog‘ona pastladi

O‘zbekiston xavfsiz davlatlar reytingida bir yilda 14 pog‘ona pastladi. Bu haqda “Numbeo” servisining jahon mamlakatlaridagi 2021 yilgi jinoyatchilik darajasi indeksida ko‘rsatib o‘tilgan.

Reyting Crime Index — Jinoyatlar indeksi, Safety Index — Xavfsizlik indeksi asosida hisoblanadi. Umumiy 100 ball har ikki holat darajasiga qarab taqsimlanadi: Ballar Jinoyatlar indeksida qancha past va aksincha, Xavfsizlik indeksida qancha yuqori bo‘lsa, shuncha yaxshi.

O‘zbekistonning 2021 yildagi ko‘rsatkichlari: Crime Index — 34,70 va Safety Index — 65,30 ball.

O‘zbekiston jinoyatlar indeksida135 davlat ichida 96 o‘rinni egallagan. Xavfsizlik indeksida 40-o‘rinni band qilgan. Qayd etish kerakki, 2020 yil o‘rtalarida mamlakat bu borada 26-o‘rinda edi.

Yangilangan reytingda O‘zbekiston xavfsizlik va jinoyatlar bobida Litva va Kuvaytdan ortda, Vengriya va Germaniyadan oldinda bo‘lib turibdi.

Xavfsizlik bobida O‘zbekiston Osiyoda 19-o‘rinda (2020 yil o‘rtalarida 12-o‘rinda edi). Yoki boshqacha aytganda, jinoyatlar sodir etilishi bo‘yicha qit’ada 43 mamlakat orasida 25-o‘rinda.

Jahon miqyosida jinoyatchilik eng avjiga chiqqan besh mamlakat xuddi o‘tgan yilgidek: Venesuela (84.25), Papua-Yangi Gvineya (80.24), JAR (77.07), Afg‘oniston (76.37), Gonduras (74.78).

Jahonda jinoyatlar eng kam sodir etilayotgan, eng xavfsiz besh mamlakat va hudud: Qatar (12.29), Tayvan (15.24), BAA (15.35), O‘mon (20.26) va Men oroli (20.79). O‘tgan yili 4-o‘ringa ko‘tarilgan Gruziya bu safar 10-o‘rinda.