O‘zbekiston yana bir Afrika davlati bilan diplomatik aloqa o‘rnatdi

Kecha, 5 fevral kuni Nyu-York shahrida bo‘lib o‘tgan uchrashuvda  O‘zbekiston va Somali o‘rtasida diplomatik aloqalarni o‘rnatish haqidagi qo‘shma kommyunike imzolandi. Bu haqda “Dunyo” axborot agentligi xabar berdi. 

Bu hujjat ikki davlat hukumatlari nomidan O‘zbekistonning BMTdagi doimiy vakili Ulug‘bek Lapasov va Somalining BMTdagi doimiy vakili Abukar Dahir Usmon tomonidan imzolandi. Natijada Somali Federativ Respublikasi O‘zbekiston bilan diplomatik munosabatlar o‘rnatgan 157-davlatga aylandi.

Uchrashuvda siyosiy, iqtisodiy va madaniy-gumanitar sohalarda hamkorlikning ikki mamlakat uchun ham manfaatli tomonlarini topish maqsadida o‘zaro aloqalarni oshirish bo‘yicha kelishuvga erishildi.

Shuningdek, bu hujjatning imzolanishi O‘zbekiston uchun Afrika davlatlari o‘rtasidagi hamkorlikni mustahkamlash yo‘lidagi muhim qadam bo‘lgani qayd etilgan.

Ma’lumot uchun, Somali Sharqiy Afrikada, Somali yarimorolida joylashgan. Davlat neft va gaz zaxiralariga ega. Iqtisodiyotning asosiy qismi chorvachilikka asoslangan bo‘lib, baliqchilik  ham muhim sektor hisoblanadi. Shuningdek, Somalidan banan, mango, kunjut va makkajo‘xori kabi mahsulotlar eksport qilinadi. Ushbu davlat qirg‘oqlarini Hind okeani suvlari yuvib turadi.

Eslatib o‘tamiz, 2024 yilning sentyabr oyi oxirida O‘zbekiston Markaziy Amerikadagi Bagama Orollari Hamdo‘stligi bilan diplomatik aloqa o‘rnatgandi. Ikki davlat o‘rtasidagi qo‘shma kommyunike Tashqi ishlar vazirlari – Baxtiyor Saidov va Frederik Mitchel tomonidan imzolangan.

Sara Komiljonova