O‘zbekiston “Turkmanboshi” dengiz portidan foydalanmoqchi

O‘zbekiston Turkmanistonning “Turkmanboshi” dengiz porti infratuzilmasidan foydalanishni rejalashtirmoqda. Toshkentda o‘tgan Savdo-iqtisodiy, ilmiy-texnikaviy, madaniy-gumanitar hamkorlik bo‘yicha O‘zbekiston-Turkmaniston Hukumatlararo komissiyasining 16-yig‘ilishida tomonlar shu haqda muzokara o‘tkazdi.

Yig‘ilish O‘zbekiston Respublikasi Bosh vazirining o‘rinbosari - investitsiyalar va tashqi savdo vaziri Sardor Umrzoqov hamda Turkmaniston Vazirlar Mahkamasi Raisining o‘rinbosari Esenmirat Orazgeldiyev hamraisligida bo‘lib o‘tdi.

Yig‘ilish kun tartibi investitsiyaviy, savdo-iqtisodiy, sanoat, energetika, qishloq xo‘jaligi, suv xo‘jaligi, ilmiy-texnik, transport va tranzit, madaniy-gumanitar sohalardagi hamkorlikning keng ko‘lamli masalalarini qamrab oldi.

Ikki mamlakat o‘rtasida transport jihatidan o‘zaro bog‘liqlikni yaxshilashga alohida e’tibor qaratildi. Jumladan, tomonlar transport yo‘laklarini yanada rivojlantirish, aviaqatnovlarni bosqichma-bosqich qayta tiklash, 2022 yilda o‘zaro tarif imtiyozlarini taqdim etish, “Turkmanboshi” dengiz porti infratuzilmasidan foydalanish istiqbollari hamda boshqa tashabbuslarni nazarda tutuvchi qo‘shma choralarni ishlab chiqish va qabul qilishga kelishib oldilar.