O‘zbekiston tashqi savdo aylanmasining 2019 yil yakunlari e’lon qilindi

2019 yil yakunida O‘zbekiston Respublikasi tashqi savdo aylanmasi 42,2 mlrd dollarni tashkil etib, o‘tgan yilning shu davriga nisbatan 8,3 mlrd dollarga o‘sdi (o‘sish sur’ati – 26,2 foiz). Bu haqda Investitsiyalar va tashqi savdo vazirlining o‘tgan yil yakunlari bo‘yicha ma’lumotida ko‘rsatilgan.

Xususan, mahalliy tovarlar va xizmatlarning xorijiy mamlakatlarga eksporti 2018 yilga nisbatan 3,9 mlrd dollarga yoki 15 foizga o‘sdi va 17,9 mlrd dollarni tashkil etdi.

Eksportning asosiy ulushi qimmatbaho va yarim qimmatbaho metallardan tayyorlangan mahsulotlar - 5,1 mlrd dollar (umumiy eksportdagi ulushi 28,5 foiz), xizmatlar - 3,6 mlrd dollar (19,9 foiz), energiya tashuvchilar - 2,5 mlrd dollar (14,1 foiz), to‘qimachilik mahsulotlari - 1,6 mlrd dollar (9,1 foiz), oziq-ovqat mahsulotlari - 1,5 mlrd dollar (8,5 foiz), rangli metallar va ulardan tayyorlangan mahsulotlar - 951,3 mln dollar (5,3 foiz), kimyoviy mahsulotlar va ulardan tayyorlangan mahsulotlar - 876,9 mln dollar (4,9 foiz), qora metallar va undan tayyorlangan buyumlar - 349,6 mln dollar (2 foiz) hissasiga to‘g‘ri keladi.

Ta’kidlash lozimki, 2019 yil davomida 2700 ta yangi korxonalar eksport faoliyatiga jalb qilinib, ular hisobiga 1 mlrd dollardan ortiq qo‘shimcha eksport amalga oshirildi. Bundan tashqari, 42 ta mamlakatlar bozorlariga 206 ta yangi turdagi mahsulotlar eksporti o‘zlashtirildi.

Respublika import ko‘rsatkichi hisobot davrida 4,8 mlrd dollarga o‘sib, 24,3 mlrd dollarga yetdi, bu esa 2018 yilga nisbatan 25 foizga ko‘pdir.

Import tarkibini asosan asbob-uskunalar - 5,6 mlrd dollar (jami importdagi ulushi 23,1 foiz), transport vositalari va ehtiyot qismlar - 2,6 mlrd dollar (10,8 foiz), xizmatlar - 2,4. mlrd dollar (10 foiz), qora metallar va ulardan tayyorlangan mahsulotlar - 2,2 mlrd dollar (9,1 foiz), elektr jihozlari - 1,3 mlrd dollar (5,5 foiz), oziq-ovqat mahsulotlari - 1,2 mlrd dollar (5,2 foiz), energiya tashuvchilar - 928,1 mln dollar (3,8 foiz), farmatsevtika mahsulotlari - 926,8 mln dollar (3,8 foiz), yog‘och va undan tayyorlangan mahsulotlar - 903,7 mln dollar (3,7 foiz), kimyoviy mahsulotlar - 843,5 mln dollar (3,5 foiz), plastmassa va undan tayyorlangan mahsulotlar - 811,7 mln dollar (3,3 foiz) va boshqalar tashkil qiladi.

O‘zbekiston Respublikasining tashqi savdo hamkorlari soni hisobot davrida 178tani tashkil etdi. Ayni paytda Xitoy (7,6 mlrd dollar yoki 18,1 foiz), Rossiya (6,6 mlrd dollar yoki 15,7 foiz), Qozog‘iston (3,3 mlrd dollar yoki 8 foiz), Koreya Respublikasi (2,7 mlrd dollar yoki 6,5 foiz), Turkiya (2,5 mlrd dollar yoki 6 foiz), Germaniya (980 mln dollar yoki 2,3 foiz), Qirg‘iziston (829 mln dollar yoki 2 foiz), Afg‘oniston (618 mln dollar yoki 1,5 foiz) va AQSH (596 mln dollar yoki 1,4 foiz) tovar aylanmasi bo‘yicha yetakchilar hisoblanadilar.

2019 yil yanvar-dekabr oylarida MDH mamlakatlari bilan savdo hajmi 12,2 mlrd dollarni tashkil etib, bu o‘tgan yilga nisbatan 20 foizga ko‘proqdir. Shu nuqtai nazardan Rossiya (MDH mamlakatlari bilan umumiy savdoning 54 foiz), Qozog‘iston (27 foiz), Qirg‘iziston (6,7 foiz), Turkmaniston (4,4 foiz) asosiy savdo sheriklar hisoblanadi.

Shuningdek, qo‘shni davlatlar bilan tashqi savdo hajmi sezilarli darajada o‘sib, 5,8 mlrd dollarni tashkil etdi (2018 yilga nisbatan 25 foizga o‘sdi), bunda eksport qariyb 3,2 mlrd dollarni va import 2,6 mlrd dollarni tashkil etdi.

Tashqi iqtisodiy faoliyat bo‘yicha 20 ta yirik hamkor davlatlar orasida 5 ta mamlakat - Qirg‘iziston, Afg‘oniston, Tojikiston, Eron va Fransiya  bilan tashqi savdo aylanmasining ijobiy saldosi kuzatilmoqda.