O‘zbekiston Konstitutsiyasiga 29 yilda nechta qo‘shimcha kiritilgan?

Bugun, 8 dekabr kuni O‘zbekiston Respublikasining Konstitutsiyasi qabul qilinganiga 29 yil to‘ldi. Shu vaqtgacha mamlakat bosh qomusiga 16 marta o‘zgartirish kiritib bo‘lingan.

O‘tgan 29 yil davomida Konstitutsiyaga quyidagi o‘zgartirishlar kiritilgan:

1993 yil 28 dekabrda qabul qilingan Qonun bilan Konstitutsiyaning 77-moddasi 1-qismidagi “150 nafar deputatdan” degan so‘zlar “deputatlardan” degan so‘z bilan almashtirildi;

2002 yil 27 yanvarda o‘tkazilgan umumxalq referendumi natijalariga ko‘ra hamda uning asosida 2003 yil 24 aprelda qabul qilingan Qonuniga muvofiq,  Konstitutsiyaning  XVIII, XIX, XX, XXIII boblariga o‘zgartishlar va qo‘shimchalar kiritilgan;

2007 yil 11 apreldagi Qonun bilan  Konstitutsiyaning 89-moddasiga, 93- moddasining 15-bandiga, 102-moddasining ikkinchi qismiga tuzatishlar kiritilgan;

2008 yil 25 dekabrda qabul qilingan Qonun bilan Konstitutsiyaning 77-moddasi birinchi qismiga o‘zgartish kiritilgan;

2011 yil 18 aprelda qabul qilingan Qonun bilan  Konstitutsiyasining 78, 80, 93, 96 va 98-moddalariga o‘zgartish va qo‘shimchalar kiritilgan;

2011 yil 12 dekabrda qabul qilingan Qonun bilan Konstitutsiyaning 90-moddasi ikkinchi qismiga tuzatish kiritilgan;

2014 yil 16 aprelda qabul qilingan Qonun bilan  Konstitutsiyaning 32, 78. 93, 98, 103 va 117-moddalariga o‘zgartish va qo‘shimchalar kiritilgan;

2017 yil 6 aprelda qabul qilingan Qonun bilan Konstitutsiyaning 80, 81, 83, 93, 107, 110 va 111-moddalariga o‘zgartish va qo‘shimchalar kiritilgan;

2017 yil 31 mayda qabul qilingan Qonun bilan Konstitutsiyaning 80, 93, 108, va 109-moddalariga o‘zgartish va qo‘shimchalar kiritilgan;

2017 yil 29 avgustda qabul qilingan Qonun bilan Konstitutsiyaning 99 va 102-moddalariga o‘zgartish va qo‘shimchalar kiritilgan;

2018 yil 15 oktyabrda qabul qilingan Qonun bilan 105-moddaning birinchi qismidagi “ikki yarim yil muddatga raisni (oqsoqolni) va uning maslahatchilarini” degan so‘zlar “raisni (oqsoqolni)” degan so‘zlar bilan almashtirilgan;

2019 yil 18 fevralda qabul qilingan Qonun bilan 80 va 93-moddalariga o‘zgartirish kiritilib, Milliy xavfsizlik xizmati Davlat xavfsizlik xizmati deb yuritila boshlandi;

2019 yil 5 martda qabul qilingan Qonunga asosan 79,  93 va 98-moddalarga o‘zgartirishlar kiritilgan;

2019 yil 4 sentyabrda qabul qilingan Qonunga asosan saylov to‘g‘risidagi qonun hujjatlari takomillashtirilishi munosabati bilan 96 va 117-moddalarga o‘zgartirishlar kiritildi;

2021 yil 8 fevralda qabul qilingan Qonunlar bilan 117-moddaga saylovlarni oktyabr oyida o‘tkazishga oid, shuningdek, 7, 33, 85, 86, 93, 98, 100-moddalarga qonunchilik hujjatlari tushunchasi bilan bog‘liq, 107-moddaga sud tizimi islohotlari bilan bog‘liq o‘zgartirishlar kiritilgan.

Ma’lumot o‘rnida, dunyoda ilk bor AQSHda 1787 yilda Konstitutsiya qabul qilingan. O‘tgan 234 yilda Amerika bosh qomusiga 27 marta o‘zgartirish kiritilgan.