O‘zbekiston qiyin kechgan bahsda Eronga imkoniyatni boy berib qo‘ydi

Bugun, 20 iyun kuni “CAFA Nationʼs Cup 2023” musobaqasining final bahsida O‘zbekiston va Eron terma jamoalari o‘zaro kuch sinashdi.

Uchrashuvning birinchi bo‘limiga start berilishi bilan o‘zbekistonlik futbolchilar faollikni o‘z tomoniga og‘dirib oldi. Birinchi daqiqaning o‘zida jamoaviy hujum uyushtirgan O‘zbekiston tomonini raqib futbolchilari qo‘pollik ishlatib to‘xtatib qoldi. 

Jaloliddin Masharipov Eron jarima maydoni yaqinida o‘zi ishlagan vaziyatni jonli devorni mo‘ljalga olish orqali yo‘qqa chiqardi.

Bir muncha qo‘polliklarga boy boshlangan bahsning dastlabki 5 daqiqaligida forslar muhofazasidagi hududda hujum vaziyati bartaraf etildi biroq, bu holatda Eron darvozaboni Ali Rizo va himoyachisi Said Ezatolahi o‘zaro to‘qnashib ketdi. Oqibatda raqib jamoaning tajribali darvozaboni almashtirildi.

Shuningdek, uchrashuvning 12-daqiqasida o‘zbekistonlik futbolchilar maydon markazida xatoga yo‘l qo‘ydi. Bundan unumli foydalangan Sardor Azum darvozani to‘g‘ri mo‘ljalga oldi ammo, hakam bu vaziyatni o‘yindan tashqari holat deb baholadi va gol hisobga olinmadi.

Final bahsini bosqarib borayotgan rossiyalik hakam Kirill Levnikov to‘xtalishlarni inobatga olgan holda o‘yinning asosiy vaqtiga 8 daqiqa qo‘shib berdi. Bir qancha xavfli vaziyatlar va qo‘polliklar ichida o‘tgan bahsning birinchi bo‘limi 0:0 hisobida yakunlandi.

Uchrashuvning ikkinchi 45 daqiqaligida faollikni oshirgan Eron terma jamoasi 47-daqiqada O‘zbekiston darvozasiga gol kiritib hisobni ochdi. Gol muallifi Sardor Azum.

Ikkinchi bo‘limning asosiy vaqtida hisob o‘zgarmadi. Eron terma jamoasi a’zosi Muhammad Kanoni qizil kartochka oldi va maydonni tark etish o‘rniga hakamga e’tiroz bildirib chim ustiga yotib oldi. Bu vaziyat jamoalar o‘rtasida katta mojaro keltirib chiqardi.

Maydondagi bahsli vaziyat yakunlangach, bittaga kam bo‘lib qolgan Eron O‘zbekiston ustidan 1:0 hisobida g‘alabaga erishdi.

Shu tariqa forslar “CAFA Nationʼs Cup 2023” musobaqasining rasmiy chempioniga aylanib, final kubogini uyiga olib ketadigan bo‘ldi.

Muhsinjon Umurzoqov