O‘zbekiston ekin maydonlarini Tojikiston suvi hisobiga sug‘oradi

Joriy yilda kuzatilayotgan suv tanqisligi sharoitida O‘zbekistonning Sirdaryo havzasiga bog‘langan maydonlaridagi qishloq xo‘jaligi ekinlarini sug‘orish uchun Tojikistonning “Baxri Tochik” suv omboridan qo‘shimcha suv olinadi. Bu haqda O‘zbekiston Suv xo‘jaligi vazirligi xabar berdi.

“Baxri Tochik” suv omboridan qo‘shimcha suv chiqarishni tashkil qilish maqsadida Tojikistonga quvvati 500 l/s, suv chiqarish balandligi 10 m bo‘lgan 5 dona A50GO-0,5/10 rusumli nasos agregati, 20 dona ESV turdagi har xil nasoslar va boshqa moddiy-texnik resurslar yetkazib beriladi. 

Shuningdek, nasos stansiyalarini ta’mirlash-tiklash xarajatlari qoplab beriladi. Bu ishlarni amalga oshirish uchun Vazirlar Mahkamasining zaxira jamg‘armasi hisobidan 1,5 mlrd so‘m mablag‘ ajratiladi.

Ushbu moddiy-texnik resurslar Tojikiston Respublikasi Energetika va suv resurslari vazirligining tegishli tashkilotiga qaytarib olmaslik sharti bilan topshiriladi.