O‘zbek jangchilarini chetga olib chiqayotganlar, sportchilarga e’tiborli bo‘ling – Ro‘ziboyev (video)

Ijtimoiy tarmoqlarda Qozog‘istonning “Octagon” ligasi jangchilari o‘zbekistonlik Odilxon Kamolov qozog‘istonlik Erkebulan Toktar ishtirokida videolar tarqalmoqda. Videoda ikkala pop MMA ustasi xuddiki, navbatdagi tresh-tokni uyushtirayotgani, biroq Toktar Kamolovning yuziga zarba yo‘llagani aks etgan.

Mazkur video tarqalgach, Kamolov o‘z Instagram sahifasiga video joylab, Qozog‘istonda xavfsizligi ta’minlanmagani, Toktardan boshqa shaxslar ham tresh-tokka aralashganini bildirdi. Bo‘lib o‘tgan holatlarga esa o‘zbekistonlik UFC jangchisi Nursulton Ro‘ziboyev norozilik bilan chiqdi.

“O‘zbekistonda MMA turnirlari o‘tkazilsa, boshqa davlatlardan jangchilar mehmon bo‘lib keladi va bizni mamlakatdan hech kim norozi bo‘lib ketmagan. Sportchilarning hurmati doim joyiga qo‘yilgan. O‘zbek jangchilari chet davlatga chiqqanda esa ayrim muammolarga duch kelayotganining guvohi bo‘lyapmiz. O‘zbekistonlik jangchilarni chet elga olib chiqayotganlar sportchilarimizga sal e’tiborli bo‘ling. Hamma narsani jangchilarning o‘zi hal qilsa, katta muammolar yuzaga kelishi mumkin. Bunday holatlar o‘zimning ham boshimdan o‘tgan”, deydi Ro‘ziboyev.

Bir kun avval ko‘plab o‘zbekistonlik MMA jangchilari “Octagon” ligasining matbuot anjumanida qatnashishi uchun Olmaota shahriga yo‘l oldi. Bo‘lib o‘tgan vaziyatga esa Toktar ham o‘z munosabatini bildirdi.

“Shaxsiy dushmanlik faqat Odilxonga tegishli, men o‘zbek xalqini hurmat qilaman va sevaman, lekin bu odam endi o‘z yolg‘onlari bilan xalqlarni qarama-qarshi qo‘ymoqchi. Bu shaxsiy mojaro va xalqlarga taalluqli emas. Bu odamga ishonmang!”, deydi Toktar.