O‘tgan mavsum kashfiyoti “Bude-Glimt” yana Chempionlar ligasiga chiqdi

Kecha, 25 avgust kuni Norvegiyaning “Bude-Glimt” jamoasi ikki uchrashuv natijasiga ko‘ra Niderlandiyaning “NEC” klubini 3:1 va 3:0 hisoblarida mag‘lub etdi. Natijada norvegiyaliklar 2026-2027 yilgi mavsum ham Chempionlar ligasining asosiy bosqichida ishtirok etadigan bo‘ldi.

O‘tgan mavsumda “Bude-Glimt” o‘z maydonida Pep Gvardiola boshchiligidagi “Manchester Siti” hamda Ispaniyaning “Atletiko Madrid” klublarini mag‘lub etib, pley-off bosqichiga yo‘l olgan edi.

1/8 finalda esa Norvegiya klubi Italiya chempioni “Inter”ni musobaqadan chiqarib yuborgan. 

Shuningdek, Avstriyaning LASK jamoasi ham kecha, 25 avgust kuni Shotlandiyaning “Seltik” jamoasiga qarshi birinchi o‘yinda 0:3 hisobida yutqazgan bo‘lishiga  qaramay, javob bahsida qo‘shimcha vaqtda 5:1 hisobida g‘alaba qozonib, keyingi bosqichga chiqdi.

Shu tariqa, 2026-2027 yilgi Chempionlar ligasi mavsumining asosiy bosqichida ishtirok etadigan 36 jamoadan 32 tasi ma’lum bo‘ldi. Qolgan to‘rtta jamoa bugun, 26 avgust kuni bo‘lib o‘tadigan saralash pley-off bosqichining javob uchrashuvlaridan so‘ng aniqlanadi.

Asosiy bosqichga qur’a tashlash marosimi joriy yilning 27 avgust kuni Monakoda o‘tkaziladi.

Ma’lumot uchun, Chempionlar ligasining amaldagi g‘olibi Fransiyaning “Pari Sen-Jermen” klubi hisoblanadi.

Eslatib o‘tamiz, avvalroq Umarali Rahmonaliyev to‘p tepadigan Ozarbayjonning “Sabah” klubi tarixda birinchi marta Chempionlar ligasining asosiy bosqichiga yo‘llanma olgan edi.