Umarov AQSHga Rossiyadagi nishonlar ro‘yxatini topshirdi

Ukraina Mudofaa vaziri Rustam Umarov Vashingtonga tashrifi chog‘ida Amerika tomoniga Rossiya hududiga chuqur zarba berish uchun mo‘ljallangan nishonlar ro‘yxatini topshirganini tasdiqladi. Bu haqda u CNN telekanaliga bergan intervyusida ma’lum qildi.

“Biz aholini Rossiya terroridan himoya qilish uchun qanday imkoniyatlarga ega bo‘lishimiz kerakligini tushuntirdik ... shuning uchun bizni eshitishdi, deb umid qilaman”, deydi vazir.

Umarovning so‘zlariga ko‘ra, zarbalar uchun armiyaning ATACAMS taktik raketa tizimlaridan foydalanish mumkin. 

“Biz ularning samolyotlarining shaharlarni bombalash uchun chegaramizga yaqinlashishiga yo‘l qo‘ymoqchi emasmiz”, deya qo‘shimcha qildi vazir.

CNN'ning yozishicha, Amerika Qo‘shma Shtatlari ATACAMS'dan foydalanish bo‘yicha cheklovlarni yumshatishi kutilmayapti.

“Siz ukrainaliklar AQSH xavfsizlik yordamidan transchegaraviy hujumlardan mudofaa qilish, boshqacha qilib aytganda, o‘t ochish uchun foydalanishi mumkin, degan gaplarimizni eshitgansiz. Ammo uzoq masofali zarbalar, Rossiya hududiga chuqur zarbalar berishga kelsak, bizning siyosatimiz o‘zgarmadi", dedi Pentagon matbuot kotibi general-mayor Patrik Rayder shu hafta boshida.

Vashington AQSH omborlaridagi cheklangan miqdor va komplekslarni ishlab chiqarish muddati uzoqligi sababli Kiyev ATACAMS'ning muhim yangi yetkazib berilishini kutmasligi kerakligini aniq aytdi.

AQSH Mudofaa vaziri Lloyd Ostin 30 avgust kuni Vashingtonda Umarov bilan uchrashdi. Pentagon rahbari Rossiyaning Ukrainadagi muhim fuqarolik infratuzilmasiga uyushtirgan hujumlarini qoraladi va Qo‘shma Shtatlar va uning ittifoqchilari Kiyevga o‘zini himoya qilish uchun asosiy imkoniyatlarni taqdim etishda davom etishini aytdi.

"Men shuni aytmoqchimanki, tinch aholiga qilingan hujumlarga yo‘l qo‘yilmaydi va Ukrainaning chidamliligi Putinning tajovuzkorligi va vahshiyliklariga qarshi g‘alaba qozonishga yordam beradi", deb ta’kidladi u.

Uchrashuv Ukraina mudofaasi bo‘yicha kontakt guruhining (Ramshteyn formati) sentyabr oyida bo‘lib o‘tadigan navbatdagi yig‘ilishi oldidan bo‘lib o‘tdi. Aloqa guruhi Ukrainaga harbiy yuklarni yetkazib berish bo‘yicha sa’y-harakatlarni muvofiqlashtirib, ularni yetkazib berishni tezlashtirish yo‘llarini o‘rganmoqda.

DPA agentligiga ko‘ra, uchrashuv 6 sentyabr kuni bo‘lib o‘tadi. Aloqa guruhiga 50 ga yaqin davlat kiradi. Muzokaralarga NATOga a’zo bo‘lmagan davlatlar ham taklif qilingan. Bu guruhning 24 yig‘ilishi bo‘ladi, muzokaralarning asosiy qismi videokonferensiya formatida o‘tkaziladi.