Ulug‘bek Rashidov dunyo miqyosida yilning eng yaxshi erkak sportchisi deb topildi

Butunjahon taekvondo federatsiyasi (WT) 2024 yilning eng yaxshilarini aniqlash uchun sportchilar va murabbiylarning ovoz berish natijalarini e’lon qildi. Unga ko‘ra, yilning eng yaxshi erkak sportchisi nominatsiyasida ushbu sport turi bo‘yicha O‘zbekiston milliy terma jamoa a’zosi, ikki karra Olimpiya o‘yinlari g‘olibi Ulug‘bek Rashitov g‘olib bo‘ldi. Bu haqda O‘zbekiston taekvondo WT assotsiatsiyasi xabar berdi.

Qayd etilishicha, taqdirlash marosimi bugun, 4 dekabr kuni Gonkongda davom etayotgan pumse bo‘yicha Jahon chempionati doirasida bo‘lib o‘tgan. Unda Ulug‘bek Rashitov ham ishtirok etib, Butunjahon taekvondo federatsiyasi bosh kotibi Seo Jeongkangdan o‘z sovrinini qabul qilib olgan.

“Ta’kidlash lozim, bu o‘zbek taekvondosining Yangi O‘zbekistonga keltirgan yangi g‘alabasiga aylandi. Boisi, bunga qadar yuqori natijalarga erishgan sportchilarimiz dunyo miqyosida e’tirof etilmagan edi”, deyiladi xabarda.

Nominatsiyalar bo‘yicha g‘oliblar ro‘yxati:

• "Yilning eng yaxshi erkak sportchisi" – Ulug‘bek Rashitov (O‘zbekiston)
• "Yilning eng yaxshi ayol sportchisi" – Viviana Marton (Vengriya)
• "Yilning eng yaxshi ayol para sportchisi" – Leonor Angelika Espinoza (Peru)
• "Yilning eng yaxshi erkak para sportchisi" – Imamaddin Halilov (Ozarbayjon)
• "Yilning eng yaxshi zarbasi sohibi" – Park Teejun (Koreya Respublikasi)
• "Yilning eng yaxshi murabbiyi" – Yesbol Sultanov (Tunis)
• "Yilning eng yaxshi para murabbiyi" – Endryu Dir (Buyuk Britaniya)
• "Yilning eng yaxshi Olimpiya hakami" – Mohamedali Elsayed (Misr)
• "Yilning eng yaxshi Paralimpiya hakami" – Paula Ramires Ruis (Ispaniya).