Ukrainaning Rossiyaga bostirib kirishi urushni tezroq tugatishi mumkin – FP

Ukraina qo‘shinlari tomonidan Rossiyaning Kursk viloyatidagi bosib olingan hududlar Rossiya Federatsiyasi tomonidan egallangan Ukraina hududlariga almashtirilishi mumkin. Bu haqda “Foreign Policy” yozmoqda.

Nashr tomonidan e’lon qilingan tahliliy maqolada ta’kidlanishicha, agar Kiyev bosib olingan hududlarni saqlab qola olsa, bu Ukrainaga Rossiya Federatsiyasi bilan muzokaralar uchun zarur bo‘lgan muhim ta’sir ko‘rsatadi. Bundan tashqari, Kremlning “qizil chiziqlari” endi ko‘proq zaiflashgan, chunki Ukraina qo‘shinlarining Rossiya hududida G‘arb qurollaridan foydalanishi uchinchi jahon urushiga olib kelmadi.

“Zelenskiy mojaro dinamikasini o‘zgartirish va tezlashtirish, jumladan, agar muzokaralar kutilganidan ertaroq boshlansa, ko‘proq ta’sirga ega bo‘lish uchun garov o‘ynashga qaror qilgan bo‘lishi mumkin”, deb yozgan jurnal.

To‘rt kun ichida Rossiya-Ukraina urushi keskin o‘zgardi. Ukraina kuchlarining Rossiyaning Kursk viloyatiga bostirib kirishi 2022 yil kuzida Xarkov va Xersonda Ukrainaning muvaffaqiyatli qarshi hujumidan buyon ikki tomonning eng yirik hududiy yutug‘iga aylandi.

Ukraina rasmiylari hujum haqida bir necha bor izoh berishdan bosh tortgan bo‘lsa-da, ularning Rossiyada jang qilayotgan askarlari ijtimoiy tarmoqlarga Kurskda va yaqinda Rossiyaning ikkinchi chegaradosh viloyati Belgorodda harakatlanayotganini ko‘rsatadigan ko‘proq video va fotosuratlarni joylashtira boshladi.

“The Washington Post” nashrining yozishicha, Rossiyaga Kursk viloyatining yo‘qolgan hududlarini qaytarish uchun bir yil kerak bo‘lishi mumkin. Nashrda qayd etilishicha, Ukraina Qurolli kuchlarining to‘satdan muvaffaqiyat qozonishi Rossiya Prezidenti Vladimir Putin uchun “Vagner” qo‘zg‘olonidan keyingi eng jiddiy sinovdir.

Eslatib o‘tamiz, avvalroq Rossiya Federal xavfsizlik xizmati  direktori Aleksandr Bortnikov qarori bilan Belgorod, Bryansk va Kursk viloyatlarida aksilterror operatsiyasi rejimi joriy etildi.