Ukrainalik asirning rafiqasi unga qilingan qo‘ng‘iroq haqida gapirib berdi

Rossiyada asirda bo‘lgan Ukraina askarining rafiqasi agar u Ukrainaga xiyonat qilsa, turmush o‘rtog‘i qamoqxonada yaxshiroq sharoitga ega bo‘lishi taklifi bilan qilingan telefon suhbati haqida gapirib berdi. Bu haqda u bilan intervyu qilgan BBC xabar berdi.

“Erim meni hech qachon kechirmaydi”, degan u Kiyev yaqinidagi kvartirasida bergan intervyusida.

Bu 42 yoshli ayol ikki yildan ortiq vaqt davomida Rossiya tomonidan asirga olingan harbiy shifokor eri haqidagi xabarni kutgan edi, to‘satdan unga qo‘ng‘iroq qilingan.

Telefondagi ovoz Svetlanaga, agar u Ukrainaga xiyonat qilsa, eri qamoqxonada yaxshiroq sharoitga ega bo‘lishi yoki hatto muddatidan oldin ozod qilinishi mumkinligini aytgan.

“Ular menga Ukraina raqamidan qo‘ng‘iroq qildi. Men javob berdim va u o‘zini Dmitriy deb tanishtirdi. U ruscha shevada gapirdi”, deya eslaydi Svetlana.

Telefon qilgan noma’lum shaxs ayolga yo harbiy ro‘yxatga olish va qabulxonani yoqib yuborishi mumkinligi, harbiy mashinaga o‘t qo‘yishi yoki “Ukraina temir yo‘llari” aksiyadorlik jamiyatining elektr panellarida sabotaj qilishi mumkinligini aytgan. Ayolning ma’lum qilishicha, unda yana bir variant bor edi – Ukraina osmonini Rossiya dronlari va raketalaridan himoya qiluvchi yaqin atrofdagi havo hujumidan mudofaa bo‘linmalarini joylashtirish.

Shunday qilib, u o‘zini mahalliy poyezd yo‘lida bomba portlatishga rozi bo‘lgandek ko‘rsatgan. Qo‘ng‘iroq paytida u Molotov kokteylini qanday tayyorlash va joylashtirish bo‘yicha ko‘rsatmalar bergan.

“Bir litr yondiruvchi suyuqlik quying va ozgina benzin qo‘shing. Temiryo‘l kesishmasiga boring. U yerda kuzatuv kameralari yo‘qligiga ishonch hosil qiling. Har ehtimolga qarshi shlyapa kiying”, degan telefondagi ovoz.

U, shuningdek, Svetlanaga o‘zining mo‘ljallangan nishoniga 1-2 km qolganda uning signalini uyali telefon minoralari tutib qolmasligi uchun telefonini qanday qilib samolyot rejimiga o‘tkazish bo‘yicha ko‘rsatmalar bergan. Sababi tergovchilar bundan foydalanishi mumkinligi aytilgan.

“Siz rele qutisi nima ekanligini bilasizmi? Uni suratga oling. Bu o‘t qo‘yish uchun nishon bo‘lishi kerak. Bugungi sanani qog‘ozga yozing va uni suratga oling”, deb tushuntirgan o‘zini Dmitriy deya tanishtirgan noma’lum ovoz egasi.

Keyin Ukraina Xavfsizlik kuchlari Svetlanaga u bilan muloqot qilayotgan odam aslida Rossiyada ekanini va u aloqani to‘xtatishi kerakligini aytgan. Svetlana telefon qilgan shaxsga fikrini o‘zgartirganini aytgan. O‘shanda tahdidlar boshlangan. Ovoz egasi uning erini o‘ldirishini va uni boshqa ko‘rmasligini aytgan. Telefondagi kimsa kun bo‘yi ayolga qo‘ng‘iroq qilib, eri qiynoqqa solianyotgani va bu uning aybi ekanini ta’kidlagan. Svetlananing eri uch oy oldin asirlikdan ozod qilingan.

Harbiy asirlarni davolash bo‘yicha Ukraina muvofiqlashtirish shtabidan Petr Yasenkoning aytishicha, rus agentlari ukrainalik harbiy asirlarning qariyb 50 foizi oilalari bilan aloqada. Rasmiylar Rossiya asirligida saqlanayotgan ukrainaliklar sonini oshkor qilmadi, ammo ular sakkiz mingdan ortiq deb hisoblaydi.

Eslatib o‘tamiz, avvalroq qariyb uch yil davomida Ukrainaga bostirib kirgan Rossiya armiyasi kamida 6083 nafar elita mutaxassisini yo‘qotgani xabar qilingandi. Bu raqamga havo-desant kuchlarining yuqori jangovar bo‘linmalari, dengiz piyodalari korpusi, Mudofaa vazirligi va Rossiya Gvardiyasi maxsus kuchlari bo‘linmalarining mansabdor harbiy xizmatchilari, shuningdek, harbiy uchuvchilar kiritilgan.