Ukrainadagi qancha o‘zbekistonlik qaytarib olib kelingani aytildi

Joriy yilning 3-4 mart kunlari Ukrainadan Polshaning Katovitse aeroporti orqali 720 nafar O‘zbekiston fuqarosi olib kelindi. Bu haqda Tashqi ishlar vazirligi rasmiy vakili Yusuf Qobuljonov ma’lum qildi.

Shunday qilib, 4 mart holatiga ko‘ra, umumiy hisobda 11 ta aviareys bilan 2 579 nafar O‘zbekiston fuqarosi Vatanga qaytarilgan.

Qayd etilishicha, Katovitse aeroportidan uchta qo‘shimcha parvoz kutilmoqda: bugun soat 14:30 va 16:00 da hamda 5 mart soat 03:00 da (Toshkent vaqti bilan).

Polsha hududida O‘zbekistonning 1 480 dan ortiq fuqarosi qolmoqda. Ulardan 700 nafari Polsha davlat chegarasidagi to‘planish nuqtasiga, 780 nafari esa Katovitse aeroportiga joylashtirilgan.

“Mutaxassislarning fikricha, O‘zbekiston o‘z fuqarolarini jangovar harakatlar zonasidan olib chiqish bo‘yicha tezkor ishlarni yo‘lga qo‘ygan sanoqli davlatlar safiga kirdi. Barcha qaytarish reyslari bepul amalga oshirilmoqda”, deyiladi TIV rasmiysi axborotida.

Polshadagi O‘zbekiston elchixonasining ma’lumotlariga ko‘ra, Katovitse aeroporti bugungi kunda odamlar bilan to‘lgan. O‘zbekiston fuqarolariga sharoitlar yaratilgan, shu jumladan ular issiq ovqat bilan ta’minlangan. Shahar ma’muriyati tomonidan aeroport binosiga kirish va yo‘lovchilarni ro‘yxatga olish uchun soddalashtirilgan tizim ishga tushirilgan. Jamoat tartibi politsiya va mahalliy ko‘ngillilar tomonidan nazorat qilinmoqda. Bolali ayollar va keksalar uchun maxsus koridor tashkil etilgan. Barcha fuqarolarga oldindan tayyorlangan ro‘yxatlar asosida xizmat ko‘rsatilmoqda.

“Fuqarolarning Vatanimizga tezroq qaytish istagini anglagan holda barcha yurtdoshlarimizdan xotirjamlikni saqlashlari, vahimaga berilasmliklari, provokatsiyalar va ziddiyatli vaziyatlarga uchmasliklarini so‘raymiz. Ishontirib aytamizki, barcha fuqarolar mamlakatimizga qaytariladi”, deydi Qobuljonov.

Eslatib o‘tamiz, Ukrainadan Polsha orqali qaytarilayotgan o‘zbekistonliklarning birinchi guruhi 28 fevral kuni Toshkentga kelgan edi.