Ukrainada qancha rossiyalik askar halok bo‘lgani ochiqlandi

Rossiyaning Ukrainaga bosqini davomida 40 599 nafar rossiyalik harbiy qurbon bo‘lgan. Bu haqda “Mediazona” jurnalistlari va BBC rus xizmati ko‘ngillilar jamoasi bilan birgalikda ochiq manbalariga tayanib, ma’lum qildi.

15 dekabrdagi avvalgi yangilanishdan buyon ro‘yxatga 1175 kishi qo‘shilgan, jumladan, besh ofitser: bitta polkovnik va to‘rt podpolkovnik.

“Mediazona”ning qayd etishicha, 2023 yil Rossiya armiyasi uchun 2022 yilga qaraganda qonliroq bo‘lgan.

Shunday qilib, 2022 yilda jurnalistlar va ko‘ngillilarning ma’lumotlariga ko‘ra, kamida 15,5 ming rossiyalik harbiy halok bo‘lgan.

"2023 yil oxirida bizning ro‘yxatimizda 40,5 mingdan ortiq ism bor va biz joriy yilda ham ushbu ko‘rsatkich kamida uchdan biriga ko‘payishini kutmoqdamiz – ayniqsa so‘nggi qonli hujumlarni hisobga olgan holda. Shunday qilib, biz ishonch bilan aytishimiz mumkinki, bu yil rus qo‘shinlari urushning birinchi yilidagidan ham ko‘proq yo‘qotishlarga duch keldi”, deydi tahlilchilar.