Ukraina Rossiya bilan ziddiyatni boshlamasligi kerak edi – Tramp

Ukraina mojaroni avvalroq tugatish imkoniyatiga ega edi, biroq u Bayden ma’muriyati ko‘magida mojaroni davom ettirishni tanladi. Bu haqda AQSH Prezidenti Donald Tramp kecha, 18 fevral kuni Floridaning Mar-a-Lago shahrida bo‘lib o‘tgan matbuot anjumanida Ukraina Prezidenti Vladimir Zelenskiy Saudiya Arabistonidagi muzokaralarga taklif etilmagani sabablarini izohlayotganida so‘z ochdi.  

“Bugun men ularning: “Bizni taklif qilishmadi”, deganlarini eshitdim. Siz uch yil u yerda edingiz, uch yil oldin uni to‘xtatishingiz kerak edi. Siz buni boshidan boshlamasligingiz kerak edi. Kelishuvni avvalroq yopishingiz mumkin edi. Men Ukraina uchun shartnoma tuzishim mumkin, ularga deyarli barcha hududini berishim mumkin edi. Ammo ular buni bunday qilmaslikka qaror qilishdi. Prezident Bayden esa bu masalada qanchalik xato qilganini bilmaydi. Bu dahshatli va achinarli”, dedi AQSH Prezidenti.

Trampning ta’kidlashicha, Bayden ham, Zelenskiy ham o‘zlarining zaif rahbarligi tufayli “hech qachon sodir bo‘lmasligi kerak bo‘lgan urush”ga eshik ochgan.

Bundan tashqari, Prezident Saudiya Arabistonida muzokaralar yaxshi boshlanganini ta’kidlab, jarayon muvaffaqiyatli bo‘lishiga umid bildirdi.

Ayni paytda Tramp Yevropa tinchlikparvar kuchlarini Ukrainaga joylashtirish imkoniyatiga ochiq ekanini va bunday taklifni qo‘llab-quvvatlashini bildirdi.

“Agar biz tinchlik kelishuviga erishsak, menimcha, Yevropa nuqtai nazaridan u yerga qo‘shin yuborishimiz shart emas, lekin u yerda qo‘shinlar bo‘lsa yaxshi bo‘lardi. Men bunga umuman qarshi bo‘lmagan bo‘lardim”, deya javob berdi Prezident.

Trampning aytishicha, Fransiya bundan ayniqsa manfaatdor, shuning uchun bunday harakat “yaxshi ishora” bo‘ladi.

north_east

Zelenskiy Rossiya-AQSH muzokaralarini Ukrainaga qo‘yilgan ultimatum bilan taqqosladi

AQSH Prezidenti, shuningdek, Ukrainadagi mavjud vaziyat tufayli harbiy holat kuchga kirgani, saylovlar uzoq vaqtdan beri o‘tkazilmagani va xalq Prezident Zelenskiydan unchalik mamnun emasligini ta’kidladi.

“Ukrainada saylovlar bo‘lganiga ancha vaqt bo‘ldi. Buning Rossiyaga hech qanday aloqasi yo‘q. Buni nafaqat men, balki boshqa ko‘plab davlatlar ham aytmoqda. Ukrainadagi shaharlar tom ma’noda G‘azoga o‘xshaydi. Odamlar bundan charchagan. Odamlar biror narsa bo‘lishini xohlashadi”, dedi Tramp.

Tramp, shuningdek, Amerika qo‘shinlarini Yevropadan olib chiqish rejasi yo‘qligini aytdi.

Eslatib o‘tamiz, kecha, 18 fevral kuni Saudiya Arabistoni poytaxti Ar-Riyod shahrida bo‘lib o‘tgan Amerika va Rossiya delegatsiyalari o‘rtasidagi muzokaralar doirasida AQSH Davlat kotibi Marko Rubio va Rossiya Tashqi ishlar vaziri Sergey Lavrov uchrashgandi. Uchrashuv AQSH Prezidenti Donald Trampning Rossiya Prezidenti Vladimir Putin bilan joriy yilning 12 fevral kuni bo‘lgan muloqotning davomi sifatida tashkil etilgan. Davlat kotibi Rubio bilan birga Milliy xavfsizlik bo‘yicha maslahatchi Mayk Uolts va Tramp tomonidan ikki tomonlama munosabatlarni qayta tiklash uchun tanlangan maxsus elchi Stiv Uitkoff ham ishtirok etgan. Lavrovga esa Rossiya Prezidenti yordamchisi Yuriy Ushakov hamrohlik qilgan.