Украина Россия билан зиддиятни бошламаслиги керак эди – Трамп

Украина можарони аввалроқ тугатиш имкониятига эга эди, бироқ у Байден маъмурияти кўмагида можарони давом эттиришни танлади. Бу ҳақда АҚШ Президенти Дональд Трамп кеча, 18 февраль куни Флориданинг Мар-а-Лаго шаҳрида бўлиб ўтган матбуот анжуманида Украина Президенти Владимир Зеленский Саудия Арабистонидаги музокараларга таклиф этилмагани сабабларини изоҳлаётганида сўз очди.  

“Бугун мен уларнинг: “Бизни таклиф қилишмади”, деганларини эшитдим. Сиз уч йил у ерда эдингиз, уч йил олдин уни тўхтатишингиз керак эди. Сиз буни бошидан бошламаслигингиз керак эди. Келишувни аввалроқ ёпишингиз мумкин эди. Мен Украина учун шартнома тузишим мумкин, уларга деярли барча ҳудудини беришим мумкин эди. Аммо улар буни бундай қилмасликка қарор қилишди. Президент Байден эса бу масалада қанчалик хато қилганини билмайди. Бу даҳшатли ва ачинарли”, деди АҚШ Президенти.

Трампнинг таъкидлашича, Байден ҳам, Зеленский ҳам ўзларининг заиф раҳбарлиги туфайли “ҳеч қачон содир бўлмаслиги керак бўлган уруш”га эшик очган.

Бундан ташқари, Президент Саудия Арабистонида музокаралар яхши бошланганини таъкидлаб, жараён муваффақиятли бўлишига умид билдирди.

Айни пайтда Трамп Европа тинчликпарвар кучларини Украинага жойлаштириш имкониятига очиқ эканини ва бундай таклифни қўллаб-қувватлашини билдирди.

“Агар биз тинчлик келишувига эришсак, менимча, Европа нуқтаи назаридан у ерга қўшин юборишимиз шарт эмас, лекин у ерда қўшинлар бўлса яхши бўларди. Мен бунга умуман қарши бўлмаган бўлардим”, дея жавоб берди Президент.

Трампнинг айтишича, Франция бундан айниқса манфаатдор, шунинг учун бундай ҳаракат “яхши ишора” бўлади.

north_east

Зеленский Россия-АҚШ музокараларини Украинага қўйилган ультиматум билан таққослади

АҚШ Президенти, шунингдек, Украинадаги мавжуд вазият туфайли ҳарбий ҳолат кучга киргани, сайловлар узоқ вақтдан бери ўтказилмагани ва халқ Президент Зеленскийдан унчалик мамнун эмаслигини таъкидлади.

“Украинада сайловлар бўлганига анча вақт бўлди. Бунинг Россияга ҳеч қандай алоқаси йўқ. Буни нафақат мен, балки бошқа кўплаб давлатлар ҳам айтмоқда. Украинадаги шаҳарлар том маънода Ғазога ўхшайди. Одамлар бундан чарчаган. Одамлар бирор нарса бўлишини хоҳлашади”, деди Трамп.

Трамп, шунингдек, Америка қўшинларини Европадан олиб чиқиш режаси йўқлигини айтди.

Эслатиб ўтамиз, кеча, 18 февраль куни Саудия Арабистони пойтахти Ар-Риёд шаҳрида бўлиб ўтган Америка ва Россия делегациялари ўртасидаги музокаралар доирасида АҚШ Давлат котиби Марко Рубио ва Россия Ташқи ишлар вазири Сергей Лавров учрашганди. Учрашув АҚШ Президенти Дональд Трампнинг Россия Президенти Владимир Путин билан жорий йилнинг 12 февраль куни бўлган мулоқотнинг давоми сифатида ташкил этилган. Давлат котиби Рубио билан бирга Миллий хавфсизлик бўйича маслаҳатчи Майк Уолтц ва Трамп томонидан икки томонлама муносабатларни қайта тиклаш учун танланган махсус элчи Стив Уиткофф ҳам иштирок этган. Лавровга эса Россия Президенти ёрдамчиси Юрий Ушаков ҳамроҳлик қилган.