Зеленский Россия-АҚШ музокараларини Украинага қўйилган ультиматум билан таққослади

Саудия Арабистонида Россия ва АҚШ делегациялари ўртасида “Украина бўйича Украина иштирокисиз” музокаралар олиб борилди ва Киев ҳеч қачон Москванинг ультиматумларига рози бўлмайди. Бу ҳақда Украина Президенти Владимир Зеленский бугун, 18 февраль Туркияда сўз очди.

Зеленскийнинг эслатишича, босқин бошида Россия Украинага ультиматум қўйиб, ўз армияси сонини камайтириш, айрим ҳудудлардан воз кечиш ва россияпараст раҳбариятни тайинлашни талаб қилган.

“Менда шундай таассурот борки, ҳозир қандайдир музокаралар бўлиб ўтмоқда ва улар худди шундай кайфиятда кетмоқда, лекин улар Россия вакиллари ва Америка Қўшма Штатлари вакиллари ўртасида бўлиб ўтмоқда. Украина ҳақида, яна Украина ҳақида ва Украинасиз. Қизиқ, агар энг қийин пайтда биз бу ультиматумларнинг барчасига кўнмаган бўлсак, Украина бўйича бундай қараш ҳозир қаердан келади?” деди Зеленский.

Украина Президенти Туркияга сафари чоғида Россия-Америка учрашуви туфайли Саудия Арабистонига сафарини кечиктиришга қарор қилинганини маълум қилди.

“Биз Саудия Арабистонида бўлиб ўтадиган ушбу Россия-Америка учрашувига таклиф қилинмадик. Бу биз учун кутилмаган воқеа бўлди. Ўйлайманки, бу кўпчилик учун кутилмаган воқеа бўлди”, деди у.

Зеленский бундай вазиятда у “тасодиф”лардан қочишни хоҳлаганини айтди.

"Мен у ерда ким қолиши ва ким кетиши, ким қаерга кетаётганини билмайман. Ростини айтсам, менга фарқи йўқ. Ҳамкорларимиз биз ҳақимизда нима деб ўйлашлари менга қизиқ эмас. Биз бутунлай ҳалол, очиқмиз. Мен тасодифларни хоҳламайман. Шунинг учун ҳам Саудия Арабистонига бормайман. Биз Саудия Арабистонидаги ҳамкорларимиз билан боғландик, мен олий ҳазратлари Муҳаммад (бин Салмон Ол Сауд) билан яхши муносабатдаман ва 10 март куни расмий ташрифимга келишиб олдик”, деди Зеленский.

Президентнинг қўшимча қилишича, Киев вилоятининг босиб олинишида украиналиклар ва россияликлар ўртасида ҳеч қандай келишув бўлмаган, Беларусдаги учрашувда ҳам, Туркиядаги учрашувда ҳам ҳеч қандай келишув бўлмаган.

north_east

АҚШ ва Россия Ар-Риёдда нималарга келишиб олди?

“Украина Президенти сифатида мен ҳеч кимга ҳеч нарсани кафолатлаганим йўқ, ҳеч кимга ҳеч нарсани тасдиқлаганим йўқ. Бундан ташқари, мен Россиянинг ультиматумларига бўйсунмоқчи эмас эдим. Ва ҳозир ҳам бундай ниятим йўқ”, дея таъкидлади Президент.

Маълумот учун, Саудия Арабистонида бўлиб ўтган Россия ва Америка делегациялари ўртасидаги музокаралар чоғида Россия Федерацияси ва АҚШ президентлари Владимир Путин ва Дональд Трампнинг эҳтимолий учрашуви муҳокама қилинди. Учрашув якунида томонлар Россиянинг Украинадаги урушини тугатиш масаласини муҳокама қилиш учун музокарачиларни тайинлашга ҳам келишиб олди.

Эслатиб ўтамиз, АҚШ Давлат департаменти кеча, 17 февраль куни  Россия делегацияси билан учрашувни Украина бўйича “музокаралар”нинг бошланиши сифатида эмас, балки президентлар Дональд Трамп ва Владимир Путин ўртасидаги телефон суҳбатининг давоми сифатида кўриб чиқишга чақирганди.