Ukraina qanchalik uzoqroqqa zarba bersa, urush shunchalik qisqaroq bo‘ladi – Sibiga

Ukraina Qurolli kuchlarining Rossiya hududidagi harbiy ob’ektlarga uzoq masofali qurollar bilan zarbalar berishga ruxsat etilishi urushni burilish nuqtasiga olib kelishi mumkin. Bu haqda kecha, 18 noyabr kuni Ukraina Tashqi ishlar vaziri Andrey Sibiga BMT Xavfsizlik Kengashi yig‘ilishi oldidan Nyu-Yorkda Britaniya TIV rahbari Devid Lemmi bilan bo‘lib o‘tgan brifingda ma’lum qildi.

Sibigaga ko‘ra, AQSHning Kiyevga uzoq masofali qurollardan Rossiya hududida foydalanishga cheklovlarni olib tashlashi Ukraina uchun ijobiy ta’sir ko‘rsatadi. U bu qarorni fuqarolarni himoya qilish uchun zarur bo‘lgan qonuniy huquq deb atab, jang maydonidagi vaziyatni yaxshilashga yordam berishini ta’kidlagan.

Eslatib o‘tamiz, avvalroq AQSH Prezidenti Jo Bayden Ukrainaga Rossiyaning Kursk viloyatidagi operatsiyada qatnashayotgan Ukraina Qurolli kuchlari bo‘linmalarini himoya qilish uchun o‘z ixtiyoridagi ATACMS uzoq masofali raketalaridan foydalanishga ruxsat bergani xabar qilingan edi. Keyinchalik, Ukraina Prezidenti Vladimir Zelenskiy “The New York Times” gazetasining AQSH Prezidenti Jo Baydenning Rossiya hududiga uzoq masofali G‘arb raketalari bilan zarba berishga ruxsat bergani haqidagi ma’lumotiga izoh bergan va u bunday ruxsat olganini tasdiqlamagan.

Bu xabarlarga javoban Rossiya Tashqi ishlar vazirligi bayonot berib, agar Ukraina Rossiya hududiga hujum qilish uchun uzoq masofali raketalardan foydalansa, bu “AQSH va uning sun’iy yo‘ldoshlarining Rossiyaga qarshi harbiy harakatlarda bevosita ishtirok etishini” anglatishini ma’lum qilgandi.