ATACMS билан зарба беришга Россиянинг жавоби аниқ бўлади – Москва 

Агар Украина Россия ҳудудига ҳужум қилиш учун узоқ масофали ракеталардан фойдаланса, бу “АҚШ ва унинг сунъий йўлдошларининг Россияга қарши ҳарбий ҳаракатларда бевосита иштирок этишини” англатади. Бу ҳақда Россия Ташқи ишлар вазирлиги баёнот берди.

Россия ТИВга кўра, бу “можаронинг моҳияти ва табиатини тубдан ўзгартириш” деган маънони англатади.

“Бундай ҳолда Россиянинг жавоби адекват ва аниқ бўлади”, дейилади ТИВ баёнотида.

Вазирлик, шунингдек, Президент Владимир Путиннинг ушбу мавзу бўйича сўнгги сўзларини эслатган. Путин Украинанинг ўзи бундай зарбаларни амалга ошира олмаслигини айтган. Унинг сўзларига кўра, бу фақат “НАТО сунъий йўлдошлари” маълумотларидан фойдаланган ҳолда амалга ошиши мумкин.

“The New York Times” газетаси 17 ноябрь куни АҚШнинг узоқ масофага учувчи қуроллардан фойдаланишга қўйган тақиқи бекор қилингани ҳақида ёзди. “Le Figaro” нашрининг ёзишича, шундан сўнг Франция ва Буюк Британия Украина Қуролли кучларининг SCALP ва Storm Shadow ракеталарини Россия Федерациясига ҳужумлар учун қўллашга қўйилган тақиқни бекор қилган, бироқ 18 ноябрь куни бу маълумот ўчириб ташланган. Кейинроқ АҚШ Президентининг миллий хавфсизлик бўйича маслаҳатчисининг биринчи ўринбосари Жон Файнер бу маълумотни тасдиқлашдан бош тортди. Британия Мудофаа вазири Жон Хили ҳам бу мавзуга изоҳ беришни рад этди.

Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррель эса АҚШ Украинага Россия ҳудудига 300 км чуқурликдаги зарбалар беришга рухсат берганини айтди.