Uchta viloyatga bosh imom-xatib tayinlandi

Kecha, 28 fevral kuni O‘zbekiston musulmonlari idorasi raisi, muftiy Shayx Nuriddin Xoliqnazar raisligida Surxondaryo, Samarqand hamda Toshkent viloyatlarida faoliyat yuritayotgan tuman va shahar bosh imom-xatiblari ishtirokida videomuloqot yig‘ilishi o‘tkazilib, mazkur viloyatlarga bosh imom-xatiblar tayinlandi. Bu haqda O‘zbekiston musulmonlari idorasi matbuot xizmati xabar berdi.

Bildirilishicha, Surxondaryo viloyati bosh imom-xatibi Aliakbar domla Sayfiddinov o‘z arizasiga ko‘ra vazifasidan ozod etilib, Termiz shahridagi “Hakim Termiziy” jome masjidi imom-xatibi vazifasida qoldirilgan. Termiz shahri bosh imomi va “Manguzar” jome masjidi imom-xatibi lavozimida ishlab kelayotgan Rasuljon domla Abdullayev O‘zbekiston musulmonlari idorasining Surxondaryo viloyatidagi vakili, viloyat bosh imom-xatibi vazifasiga tayinlangan.

Toshkent shahar Mirzo Ulug‘bek tumani “Oltintepa” masjidida imom-xatib bo‘lib ishlab kelayotgan Ahmadxon qori Alimov O‘zbekiston musulmonlari idorasi Samarqand viloyati vakili, viloyat bosh imom-xatibi etib tayinlangan. O‘zbekiston musulmonlari idorasi Samarqand viloyati vakili vazifasini vaqtinchalik bajarib kelgan Yoqubjon domla Mansurov bosh imom-xatib o‘rinbosari va Samarqand tumani “Xo‘ja Ahrori Valiy” jome masjidi imom-xatibi vazifalarida qoldirilgan.

O‘zbekiston musulmonlari idorasi Toshkent viloyati vakili Jasurbek domla Raupov ham o‘z ixtiyori bilan lavozimidan ozod etilib, Zangiota tumanidagi “Zangiota” jome masjidi imom-xatibi vazifasida qoldirilgan. Toshkent tumani bosh imomi va mazkur tumandagi “Hasanboy ota” jome masjidi imom-xatibi vazifasida ishlab kelayotgan Doniyor domla Ikromov O‘zbekiston musulmonlari idorasining Toshkent viloyati vakili, viloyat bosh imom-xatibi lavozimiga tayinlangan.

Eslatib o‘tamiz, avvalroq Toshkent shahrida joylashgan masjidlarda faoliyat olib borgan 8 nafar imom-xatib, 10 nafar imom noibi vazifasidan ozod etilgandi. Shuningdek, 2 nafar imom-xatib va 2 nafar imom noibiga “hayfsan” intizomiy chorasi qo‘llanilgan edi.