Turkmanistonda oziq-ovqat tanqisligi. Ayollar namoyishga chiqdi

Turkmaniston janubidagi Mari viloyatida o‘nlab odamlar oziq-ovqat tanqisligiga qarshi miting o‘tkazdilar. Namoyishni, asosan, ayollar tashkil etdi. Ular Mari viloyatini mamlakatning qolgan qismi bilan bog‘laydigan magistralni to‘sib qo‘yishdi.

Namoyishchilarning bir qismi viloyat ma’muriyati binosiga bordi. U yerda mahalliy amaldorlardan davlat do‘konlarida un, o‘simlik moyi va boshqa oziq-ovqat mahsulotlarini uzluksiz sotilishini ta’minlashni talab qilishdi.

Shuningdek, namoyishchilar davlat do‘konlarida bir necha oy davomida ehtiyoj uchun birinchi galdagi kerakli oziq-ovqat va boshqa mahsulotlar sotilmaganini aytishdi. Ularning ta’kidlashicha, ba’zi do‘konlar 1 oy davomida yopiq bo‘lgan.

Bunga javoban amaldorlar davlat do‘konlarini oziq-ovqat mahsulotlari bilan ta’minlashda vaziyatni yaxshilash choralarini ko‘rishga va’da berishdi. Keyin namoyishchilarga ikki kilogrammdan un tarqatildi.