Turkiyadagi zilzila fonida Twitter va TikTok bloklandi

Turkiyada dahshatli zilzila ortidan Twitter va TikTok bloklandi. Hukumat ijtimoiy tarmoqlarda yolg‘on va soxta axborotlar tarqatilayotganidan xavotirda. 

Mamlakat transport va infratuzilma vaziri o‘rinbosari Umar Fotih Sayyan Twitter vakolatxonasi rahbarlari bilan muzokaralar o‘tkazib, ularga noto‘g‘ri ma’lumot tarqatish uchun javobgarliklarini eslatdi. 

Uchrashuv qachon bo‘lib o‘tganiga aniqlik kiritilmagan. Turkiyada Twitter’ga to‘g‘ridan-to‘g‘ri kirish deyarli yo‘q. Rasmiy idoralar hali ham holat bo‘yicha tushuntirish bermagan. 

Agentlik ma’lumotlariga ko‘ra, Sayyan Twitter’ning global kommunikatsiyalar bo‘limi boshlig‘i Jon Xyuz va davlat siyosati direktori Ronan Kostello bilan videokonferensiya orqali gaplashgan. Yig‘ilishda tomonlar Twitter’da noto‘g‘ri ma’lumotlar, yolg‘on xabarlar paydo bo‘lishi, soxta akkauntlar va zilzila qurbonlariga yordam yig‘ish bo‘yicha firibgarlik sxemalarini oldini olish bo‘yicha ko‘rishi mumkin bo‘lgan choralar muhokama qilingan. 

Sayyan eslatib o‘tdiki, Twitter jamiyatda vahima va tartibsizlikni keltirib chiqarishi mumkin bo‘lgan noto‘g‘ri ma’lumotlarni tarqatish uchun javobgardir. Uning so‘zlariga ko‘ra, Turkiya qonunchiligi kompaniya zimmasiga, ayniqsa, ijtimoiy tarmoqlarda dezinformatsiyaning oldini olishda faol hamkorlik qilish bo‘yicha aniq majburiyatlar yuklaydi. 

Downdetector avvalroq Turkiyada Twitter va TikTok’ga kirish taqiqlanganligi haqidagi bildirishnomalar sezilarli darajada oshgani haqida xabar bergan edi. Kechqurun Instagram’ga kirish bilan bog‘liq muammolar haqida xabarlar kela boshladi.

Kecha, 8 fevral kuni Turkiya Xavfsizlik Bosh boshqarmasi zilzilalardan so‘ng provokatsion ma’lumotlar tarqatilgan 202 ta ijtimoiy tarmoq akkaunti aniqlanganini ma’lum qildi. Ushbu hisoblarga aloqador 18 kishi qo‘lga olindi, ulardan 5 nafari hibslandi. 24 ta veb-sayt yopildi, ular orqali firibgarlar zilzila qurbonlariga yordam berish niqobi ostida xayr-ehson yig‘gani aytilmoqda.