Turkiyada yana bir tumanning muxolif meri qo‘lga olindi

Bugun, 29 iyul kuni Turkiyada Istanbulning muxolifat boshqarayotgan tumani hokimi va yana besh kishi qurilish hamda foydalanishga ruxsatnomalar berishdagi qonunbuzarliklar bo‘yicha o‘tkazilayotgan tergov doirasida qo‘lga olindi. Bu haqda mamlakatning NTV telekanali xabar berdi.

Ma’lum qilinishicha, hibsga olinganlar orasida Uskudar tumani hokimi Sinem Dedetosh, tuman hokimi o‘rinbosari, kotib, arxitektor, tadbirkor va pudratchi bor. Shuningdek, huquq-tartibot idoralari Istanbuldagi 11 ta manzilda bir vaqtning o‘zida tintuv o‘tkazib, gumonlanuvchilarga tegishli raqamli materiallarni musodara qilgan.

Tergov ma’lumotlariga ko‘ra, munitsipalitet qurilishga ruxsat berish jarayonini shunday tizim asosida muvofiqlashtirganki, unda pudratchilar ruxsatnoma olish uchun avval maslahat xizmatlari bo‘yicha shartnoma imzolashga majbur bo‘lgan.

Bu hodisa 2024 yildan buyon Prezident Rajab Toyib Erdo‘g‘anga muxolifatdagi asosiy partiya boshqarayotgan munitsipalitetlarga qarshi olib borilayotgan keng ko‘lamli huquqiy choralarning navbatdagi bosqichi sifatida baholanmoqda.

Muxolifat barcha ayblovlarni rad etib, tergovlar siyosiy sabablarga ko‘ra amalga oshirilayotganini bildirgan. Turkiya hukumati esa mamlakat sud tizimi mustaqil faoliyat yuritishini bildirib kelmoqda.

Eslatib o‘tamiz, avvalroq Turkiya prokuraturasi Anqaradagi muxolifat nazoratidagi Chankaya tumani hokimi hamda yana 35 nafar shaxsni pora olish va davlat tenderlarida qoidabuzarlik qilish gumoni bilan qo‘lga olishga order bergandi.