Туркияда мухолиф мэр ва яна 35 кишини ҳибсга олишга ордер берилди

Бугун, 11 июль куни Туркия прокуратураси Анқарадаги мухолифат назоратидаги Чанкая тумани ҳокими ҳамда яна 35 нафар шахсни пора олиш ва давлат тендерларида қоидабузарлик қилиш гумони билан қўлга олишга ордер берди. Бу ҳақда Анқара Бош прокуратураси хабар қилди.

Прокуратура маълумотига кўра, гумондорлардан 27 нафари аллақачон қўлга олинган, қолганларини қидириш ишлари давом этмоқда.

Анқаранинг Чанкая тумани ҳокими, Жумҳурият халқ партияси (ЖХП) вакили Ҳусайн Жан Гюнер X ижтимоий тармоғидаги саҳифасида ўзининг қаердалигини ҳуқуқни муҳофаза қилувчи органларга маълум қилганини ва Анқарага қайтиб келаётган пайтида уйида тинтув ўтказаётган ходимлар учун захира калитини қолдирганини билдирган.

“Лавозимга киришганимиздан буён ушбу муассасани имкони борича энг яхши тарзда бошқариб келмоқдамиз ва бизга ишонч билдирган бирор кишини уялтирадиган ҳатто энг кичик хатти-ҳаракатга ҳам йўл қўймадик”, дейди Гюнер.

Ушбу операция ЖХП бошқараётган муниципалитетларга нисбатан олиб борилаётган бир қатор терговлар ортидан амалга оширилган. Туркия ҳукумати суд ҳокимияти мустақил эканини таъкидламоқда. ЖХП эса айбловларни рад этиб, мазкур терговлар сиёсий сабабларга кўра олиб борилаётганини билдирган.

Эслатиб ўтамиз, аввалроқ Туркия ҳуқуқ-тартибот идоралари ўтказилган терроризмга қарши операциялар давомида 209 кишини ҳибсга олган эди.

Шунингдек, Туркия пойтахти Анқара шаҳрида бўлиб ўтган НАТО саммити арафасида ўтказилган альянсга қарши намойишларда ҳам Туркия Коммунистик партияси (TKП) вакилларидан бўлган 100 дан ортиқ киши қўлга олинган эди.