Turkiya maktablarida Yangi yil bayramini nishonlash taqiqlandi

Turkiya Ta’lim vazirligi maktablarga rasmiy maktub yo‘llab, madaniy qadriyatlarga mos kelmasligini aytib, Yangi yil va Rojdestvo bayramlarini nishonlash bilan bog‘liq tadbirlar o‘tkazmaslikni talab qildi. Bu haqda “Milliyet” nashri xabar berdi.

Qayd etilishicha, viloyat va tuman ta’lim tashkiloti orqali yuborilgan maktubda maktablardagi har qanday faoliyat Turkiya milliy qadriyatlari, an’ana va urf-odatlariga mos bo‘lishi shartligi ta’kidlangan. Taqiq ushbu bayramlar bilan bog‘liq raqamli, yozma va vizual materiallarni nashr etishga ham tegishli.

Ushbu ko‘rsatma doirasida 16 dekabr kuni Otashahar tumani Ta’lim bo‘limi mudiri Ismoil Yildirim maktablarga Yangi yil, Rojdestvo kabi rasmiy sanalar ro‘yxatiga kiritilmagan tadbirlarni o‘tkazishga yo‘l qo‘yilmasligini aytgan.

Bog‘chilar tumani Milliy ta’lim mudirligi tomonidan maktablarga yuborilgan ko‘rsatmada Yangi yil tadbirlari nomi ostida faoliyatlar, maktab va sinflarni bezash ishlari o‘tkazilmasligi ham keltirib o‘tilgan.

Bundan tashqari, ushbu voqealar bilan bog‘liq har qanday hazillar, bayramlar yoki nashrlar taqiqlangan.

Eslatib o‘tamiz, kecha, 20 dekabr kuni Germaniyaning Saksoniya-Angalt federal yeri poytaxti Magdeburg shahrining markazida joylashgan Rojdestvo yarmarkasida BMW katta tezlikda olomonni bosib ketgandi. Hodisa oqibatida ikki kishi halok bo‘lgan. 60 dan ortiq odam jarohatlangan. Turli darajadagi jarohatlar olganlar soni 60 dan 80 kishigacha yetgan. “Volksstimme” esa 11 kishi halok bo‘lgani haqida xabar berdi, lekin bu ma’lumot rasmiy manbalar tomonidan tasdiqlanmadi. Saksoniya-Angalt hukumati vakili “Tagesschau” bilan suhbatda ushbu voqeani terror hujumi deb atadi, ammo rasmiy bayonotlar hozircha berilmagan. Fojia joyiga federal yer bosh vaziri Rayner Xazeloff yetib borgan va ushbu voqeani “dahshatli hodisa” deb ta’riflagan. Hodisa yuz bergach, Rojdestvo yarmarkasi darhol yopilgan va shahar markazidagi tramvaylar harakati to‘xtatilgan. Magdeburg politsiyasi haydovchining yakka harakat qilganmi yoki yo‘qligi hali aniqlanmaganini ma’lum qilgan. Hodisa sabablari noma’lum bo‘lib qolmoqda.

Mohimbegim Ma’rufaliyeva