Tuman hokimi o‘rinbosari va IIB xodimi noqonuniy ov uyushtirgani aniqlandi

Joriy yilning 16 oktyabr kuni Xorazm viloyatining Turkmaniston Respublikasi bilan chegaradosh Tuproqqal’a tumanining chegara oldi hududida tungi soat 02:00 larda 8 nafar fuqaro noqonuniy ov qilgani aniqlandi. Bu haqda Xorazm viloyati Ekologiya va atrof muhitni muhofaza qilish boshqarmasi xabar berdi.

9009-sonli Harbiy qism chegarachilari bilan o‘tkazilgan Ekologik nazorat tadbiri davomida 8 nafar fuqaro chegara oldi hududlarida bo‘lish rejimini hamda ov qilish va baliq ovlash qoidalarini buzib, bir dona yovvoyi to‘ng‘izni otib o‘ldirganliklari va ov qilish maqsadida yurganliklari aniqlangan.

Huquqbuzarlardan 6 ta ov quroli, 105 ta o‘q-dori va 4 ta qarmoqlar ashyoviy dalil sifatida olib qo‘yildi. 

Mazkur huquqbuzarlik holati yuzasidan to‘plangan hujjatlar sud idoralariga taqdim etiladi.

Ma’lumotlarga ko‘ra, ovchilarning biri Tuproqqal’a tumani hokimining o‘rinbosari, boshqasi tuman IIB mas’ul xodimi bo‘lgan.