Tramp Turkiyadagi Rossiya-Ukraina muzokaralarida qatnashishi mumkin

Turkiya Prezidenti Rajab Toyib Erdo‘g‘an haqiqatdan ham eng yuqori darajadagi uchrashuv o‘tkazishi mumkin. Bu haqda Ukraina Prezidenti Vladimir Zelenskiy ijtimoiy tarmoq orqali ma’lum qildi.

Zelenskiy AQSH Prezidenti Donald Trampning Ukrainadagi mojaroga barham berishga qaratilgan Turkiyadagi tinchlik muzokaralari haqidagi bayonotiga izoh berdi.

“Men hozirgina Prezident Trampning bayonotini eshitdim. Juda muhim so‘zlar. Men AQSH Prezidenti Donald Trampning to‘liq va so‘zsiz o‘t ochishni to‘xtatish g‘oyasini qo‘llab-quvvatladim – bu diplomatiya uchun asos bo‘lishi uchun yetarlicha vaqt. Va biz buni xohlaymiz, biz sukut saqlashga tayyormiz”, deb yozgan Zelenskiy.

Ukraina Prezidenti Rossiya yetakchisi Vladimir Putin bilan to‘g‘ridan to‘g‘ri muzokaralar o‘tkazishga tayyorligini ta’kidladi.

“Men Prezident Trampni Putin bilan to‘g‘ridan to‘g‘ri muzokaralar o‘tkazish g‘oyasi bilan qo‘llab-quvvatladim. Men uchrashishga tayyor ekanimni ochiq aytdim. Men Turkiyada bo‘laman. Umid qilamanki, ruslar uchrashuvdan qochmaydi”, deb yozdi Ukraina rahbari.

Zelenskiy, shuningdek, Oq uy rahbarining Istanbuldagi tinchlik muzokaralarida ishtirok etishi muhimligini ta’kidladi.

“Va, albatta, agar Prezident Tramp Turkiyadagi ushbu uchrashuvda biz bilan birga bo‘lsa, Ukrainadagi barchamiz minnatdor bo‘lardik. Bu to‘g‘ri fikr. Biz ko‘p narsani o‘zgartirishimiz mumkin”, dedi u.

Bundan tashqari, Ukraina Prezidenti Turkiya Prezidenti Rajab Toyib Erdo‘g‘anga uchrashuvni yuqori saviyada o‘tkazishga tayyorligi uchun minnatdorlik bildirdi.

“Prezident Rajab Toyib Erdo‘g‘an haqiqatan ham eng yuqori darajada uchrashuv o‘tkazishi mumkin. Yordam bergan barchaga rahmat”, deb yozgan u.

Ukraina Prezidentining bayonoti Tramp Ukraina va Rossiya o‘rtasida Istanbulda bo‘lib o‘tadigan uchrashuvda shaxsan ishtirok etish imkoniyatini ko‘rib chiqayotganini aytganidan keyin yangradi. Ma’lumki, Ukraina va Rossiya o‘rtasidagi to‘g‘ridan to‘g‘ri muzokaralar 15 may, payshanba kuni Istanbulda o‘tkazilishi rejalashtirilgan. Oq uy rahbari ehtimoliy otashkesim haqida optimizm bildirdi.

“Turkiyada 15 may payshanba kuni bo‘lib o‘tadigan uchrashuvni e’tibordan chetda qoldirmang, Prezident Erdo‘g‘an ajoyib mezbon bo‘ladi. Men u yerda 30 kunlik sulh bitimiga erishish mumkinligini his qilaman. Ayni damda qayerda bo‘lishimni bilmayman, Yaqin Sharqning biror joyida bo‘laman, lekin agar foydali bo‘ladi deb o‘ylasam, u yerga uchardim”, dedi Tramp avvalroq Oq uyda jurnalistlar bilan suhbatda.

Eslatib o‘tamiz, 11 mayga o‘tar kechasi Rossiya Prezidenti Vladimir Putin Ukrainaga hech qanday shartlarsiz Istanbulda to‘g‘ridan to‘g‘ri muzokara o‘tkazishni taklif qilgandi.  Ukraina Prezidenti Vladimir Zelenskiy esa 15 may kuni Istanbulda Rossiya Prezidenti Vladimir Putin bilan to‘g‘ridan to‘g‘ri muzokaralar o‘tkazishga tayyorligini ma’lum qildi.