Путинни шахсан ўзим Туркияда кутаман – Зеленский

Украина Президенти Владимир Зеленский 15 май куни Истанбулда Россия Президенти Владимир Путин билан тўғридан тўғри музокаралар ўтказишга тайёрлигини маълум қилди. Бу ҳақда у кеча, 11 май куни Telegram-каналида ёзди.

“Мен Путинни пайшанба куни Туркияда кутаман. Шахсан ўзим. Умид қиламанки, бу сафар руслар бунга сабаб изламайди”, дейди у.

Зеленскийнинг таъкидлашича, Киев “дипломатия учун керакли асосни таъминлаш учун” 12 майдан бошлаб тўлиқ ўт очишни тўхтатишни кутмоқда.

“Қотилликларни чўзишдан фойда йўқ”, дея қўшимча қилди Зеленский .

Украина Президенти ўзининг сўнгги баёнотида Киев аввалроқ талаб қилганидек, Москва камида 30 кун давомида ўт очишни тўхтатиш режимини эълон қилиши керакми ёки йўқлигига аниқлик киритмади.

Қайд этиш жоиз, 11 майга ўтар кечаси Россия Президенти Владимир Путин Украинага ҳеч қандай шартларсиз Истанбулда тўғридан тўғри музокара ўтказишни таклиф қилганди. 

“Россиянинг музокаралар бўйича таклифи муҳокамада, қарорни Киев ва унинг кураторлари ҳал қилади”, деди давлат раҳбари.

Путиннинг таъкидлашича, “уруш кетаётган пайтда” музокаралар ўтказишни таклиф қилишда ҳеч қандай ёмон нарса йўқ.

Бу орада Украина ва унинг Европадаги иттифоқчилари бир ойлик оташкесимга чақирди ва Россия Президенти Владимир Путин Киевга тўғридан тўғри тинчлик музокараларига қайтишни таклиф қилди ва улар янги, “ҳақиқий сулҳ” бўйича келишиб олишлари мумкинлигини инкор этмади. 

“15 май куни Истанбулда музокаралар тарихий истиқболда узоқ муддатли ва мустаҳкам тинчлик ўрнатиш мақсадида олдиндан ҳеч қандай шартларсиз давом эттирилиши мумкин”, деди Путин.

Путиннинг ёрдамчиси Юрий Ушаковнинг аниқлик киритишича, музокаралар 2022 йилда тўхтатилганлар ва “ҳақиқий вазият”ни ҳисобга олиши керак. Россия Туркияга делегация юборишга тайёр.

Кенг кўламли жанглар бошланганидан сўнг, Россия ва Украина делегациялари Беларусь ва Туркияда бир нечта учрашувлар ўтказди, бироқ кейинчалик бу жараён тўхтади. 2023 йил ноябрь ойида Украина делегацияси раҳбари Девид Арахамия музокаралардан чиқиш ва Россия шартларини рад этиш (бетарафлик эвазига ҳарбий ҳаракатларни тўхтатиш ва НАТОга киришдан бош тортиш) Буюк Британия собиқ бош вазири Борис Жонсоннинг маслаҳати билан қабул қилинганини айтди. Жонсоннинг ўзи бундай баёнотларни ёлғон деб атади. Кейинроқ Путиннинг айтишича, Украина томони Россия қўшинлари Киев ва Чернигов вилоятларидан олиб чиқиб кетилганидан кейин эришилган барча келишувларни “ташлаб қўйган”.

АҚШ Президенти Дональд Трамп, ўз навбатида, Украина учун “потенциал ажойиб кун” ва яқинлашиб келаётган “катта ҳафта” ҳақида ёзди. Республикачи айнан нимани назарда тутаётганига аниқлик киритмади – Киевнинг ўт очишни тўхтатиш ҳақидаги таклифи ёки Москванинг музокаралар ўтказиш ғояси, аммо Вашингтон ҳар икки томон билан ишлашда давом этишига ваъда берди.