Tramp ta’lim vaziri sifatida sobiq kurashchini tanladi

AQSHning saylangan prezidenti Donald Tramp ta’lim vaziri lavozimiga ishbilarmon ayol va sobiq professional kurashchi Linda Mari Makmaxon nomzodini ilgari surdi. Bu haqda Tramp jamoasining tegishli bayonoti e’lon qilindi.

Linda Makmaxon Trampning davlat rahbari sifatidagi birinchi muddatida AQSH Kichik biznes ma’muriyatiga rahbarlik qilgan.

“Kichik biznes ma’muriyatining sobiq rahbari Linda Makmaxon AQSH Ta’lim vaziri bo‘lishini e’lon qilishdan mamnunman”, deyiladi Trampning bayonotida.

Respublikachi Makmaxon amerikaliklarga o‘z farzandlarining ta’lim olishi bo‘yicha yaxshiroq qaror qabul qilish imkoniyatini berishiga ishonch bildirdi.

“Linda o‘zining o‘n yillik tajribasi va ta’lim va biznesdagi chuqur tushunchasidan amerikalik talabalar va ishchilarning keyingi avlodlariga yordam berish va Amerikani dunyodagi ta’lim sohasida birinchi o‘ringa qo‘yish uchun foydalanadi”, deydi Tramp.

Makmaxon turmush o‘rtog‘i Vins Makmaxon bilan birgalikda Titan Sports, Inc. (keyinchalik World Wrestling Entertainment, Inc.) sport-ko‘ngilochar kompaniyasiga asos solgan, u yerda 1980 yildan 2009 yilgacha prezident va keyinchalik bosh direktor bo‘lib ishlagan. Bu vaqt ichida kompaniya shimoli-sharqdagi mintaqaviy biznesdan yirik transmilliy korporatsiyaga aylandi.

U vaqti-vaqti bilan ekranda, ayniqsa WrestleMania X-Seven’dagi janglarda eri bilan chiqishlar qildi. 2009 yilda Makmaxon Konnektikutdan AQSH Senatida respublikachi sifatida qatnashish uchun World Wrestling Entertainment’ni tark etdi, ammo 2010 yilgi umumiy saylovda demokrat Richard Blumentalga yutqazdi. U 2012 yilgi poygada Konnektikut shtatidagi boshqa Senat o‘rindig‘iga Respublikachilar partiyasidan nomzod bo‘lgan, ammo demokrat Kris Merfiga yutqazgan.

Makmaxon Sharqiy Karolina universitetida o‘qigan va ikki yil davomida Konnektikut shtati ta’lim kengashida xizmat qilgan. Bundan tashqari, u 2017 yildan 2019 yilgacha AQSH Kichik biznes boshqarmasini boshqargan. Makmaxon hozirda Trampning o‘tish davridagi jamoasi yetakchilaridan biri.

CNN avvalroq xabar berishicha, Trampning atrofidagilar Makmaxon Savdo vazirligini boshqarishi mumkinligini istisno etmagan. Biroq, kecha, 19 noyabr kuni bu lavozimga investor va milliarder Govard Lutnik nomzodi ilgari surildi.

Eslatib o‘tamiz, so‘nggi kunlarda Donald Tramp o‘zining bo‘lajak ma’muriyatidagi lavozimlarga nomzodlarni tanlamoqda. Tramp Florida shtatidan senator Marko Rubioni Davlat kotibi, kongressmen Mett Getsni esa Adliya vaziri va Bosh prokuror etib tayinlash niyatida ekanini ma’lum qildi. Shuningdek, Tramp “Fox News” telekanali boshlovchisi Pit Xegsetni Pentagon rahbari, kongressmen Mayk Valsni Milliy xavfsizlik bo‘yicha maslahatchi va biznesmen Ilon Maskni AQSH Hukumat samaradorligi departamentiga rahbar etib tayinlashga qaror qilgan edi. Shuningdek, Donald Tramp “Fox Business” telekanali boshlovchisi va iqtisodchi Larri Kadlouni iqtisodiyot va moliya sohasida yuqori lavozimga tayinlashni rejalashtirmoqda. Tramp Oq uy tarixidagi eng yosh matbuot kotibini ham tayinlagandi.