Трамп Оқ уй тарихидаги энг ёш матбуот котибини тайинлади

АҚШнинг сайланган президенти Дональд Трамп Оқ уй матбуот котиби лавозимига 27 ёшли Каролин Ливиттни тайинлади. Бу ҳақда CNN хабар берди.

Маълумотларга кўра, Ливитт ушбу лавозимдаги энг ёш матбуот котиби сифатида тарихга киради. У илгари Трампнинг сайловолди кампаниясида матбуот билан алоқалар учун масъул бўлган, шунингдек, унинг биринчи президентлик даврида матбуот котиби ёрдамчиси сифатида фаолият юритган. Маълум бўлишича, Трамп ўзининг биринчи тўрт йиллик президентлик даврида тўрт нафар матбуот котибини алмаштирган. 

Трамп Ливиттни мақтаб, уни ақлли ва қаттиққўл ҳамда “самарали мулоқот қилувчи” эканини таъкидлаган. 

“Мен унинг ушбу минбарда муваффақият қозонишига ва Америка халқига бизнинг қайта буюклик сари қадамларимизни тушунтиришда ёрдам беришига тўлиқ ишонаман”, деди Трамп. 

Эслатиб ўтамиз, сўнгги кунларда Дональд Трамп ўзининг бўлажак маъмуриятидаги лавозимларга номзодларни танламоқда. Трамп Флорида штатидан сенатор Марко Рубиони Давлат котиби, конгрессмен Мэтт Гетцни эса Адлия вазири ва Бош прокурор этиб тайинлаш ниятида эканини маълум қилди. Шунингдек, Трамп “Fox News” телеканали бошловчиси Пит Хегсетни Пентагон раҳбари, конгрессмен Майк Вальсни Миллий хавфсизлик бўйича маслаҳатчи ва бизнесмен Илон Маскни АҚШ Ҳукумат самарадорлиги департаментига раҳбар этиб тайинлашга қарор қилган эди. Шунингдек, Дональд Трамп “Fox Business” телеканали бошловчиси ва иқтисодчи Ларри Кадлоуни иқтисодиёт ва молия соҳасида юқори лавозимга тайинлашни режалаштирмоқда.