Tramp Oq uyda Bayden bilan uchrashdi (video)

AQSH prezidentlik saylovlarida g‘alaba qozongan Donald Tramp bugun, 13 noyabr kuni amaldagi Prezident Jo Bayden bilan Oq uyda uchrashuv o‘tkazdi. Bu haqda “Associated Press” xabar berdi.

Qayd etilishicha, uchrashuv davomida Bayden Trampga hokimiyatni tinch yo‘l bilan topshirish niyatida ekanini ma’lum qilgan. Tramp ham bu jarayon iloji boricha “silliq” o‘tishini ta’kidlagan.

“Siyosat – bu oson ish emas, dunyo esa har doim ham yaxshi joy emas. Ammo bugun u yoqimli va men buni juda qadrlayman”, dedi Tramp.

Ma’lumot uchun, saylovoldi kampaniyasi davomida Tramp va Bayden bir-birlarini keskin tanqid qilgan. Ular oxirgi marta iyundagi debatda uchrashgan. Shundan so‘ng Bayden yoshi va prezident vazifalarini bajarish qobiliyatiga oid xavotirlar tufayli poygani tark etgan. Uning o‘rnini esa Kamola Harris egallagan.

Saylangan prezidentning lavozimdan ketayotgan prezident bilan uchrashuvi AQSH siyosiy hayotining ko‘p yillik an’anasi hisoblanadi. Biroq 2020 yilgi prezidentlik saylovlaridan so‘ng Tramp mag‘lubiyatni tan olmagan va Baydenni uchrashuvga taklif qilishdan bosh tortgan.

Tramp joriy yilgi prezidentlik saylovlaridagi g‘alabasidan so‘ng ilk bor Vashingtonga keldi va Oq uyga tashrifi oldidan u Kongress quyi palatasi – Vakillar palatasiga tashrif buyurib, respublikachilar partiyasi a’zolari bilan ham uchrashdi.