Tramp neft kompaniyasi rahbarini Energetika vaziri etib tayinlaydi

AQSHning saylangan prezidenti Donald Tramp Liberty Energy kompaniyasining asoschi va bosh direktori Kris Raytni Energetika vaziri sifatida tanladi. Bu haqda CNN xabar berdi.

Rayt Trampning “neft va gaz qazib olishni maksimal darajada oshirish rejasini” qo‘llab-quvvatlashi kutilmoqda.

“Kris energetika sohasida yetakchi texnolog va tadbirkor bo‘lib, u yadro, quyosh, geotermal, neft va gaz sohalarida ishlagan. Eng muhimi, Kris Amerika energetika mustaqilligiga turtki bo‘lgan “Amerika slanets” inqilobining boshlanishiga yordam bergan va global energiya bozorlari hamda geosiyosatni o‘zgartirgan insonlardan biri edi”, deydi Tramp.

Saylovoldi tashviqot chog‘ida energiya masalalari bo‘yicha Trampni qo‘llab-quvvatlagan oklaxomalik milliarder, Garold Xemm “Hart Energy” savdo nashriga bergan intervyusida Raytni bu lavozimdagi eng yaxshi tanlov bo‘lganini aytgan va uni “haqiqatan ham o‘tkir shaxs” deb atagan.

Kris Rayt CNBC telekanaliga bergan intervyusida esa hozirgi energiya tizimining o‘rniga yangisini qurmaguncha bu sohada yutuqlarga erishib bo‘lmasligini aytib o‘tgan.

“Menimcha, keyingi o‘ttiz yil ichida bizning uglevodorod tizimimizda sezilarli o‘zgarishlar bo‘lmaydi”, deya ta’kidlagan Rayt.

Eslatib o‘tamiz, so‘nggi kunlarda Donald Tramp o‘zining bo‘lajak ma’muriyatidagi lavozimlarga nomzodlarni tanlamoqda. Tramp Florida shtatidan senator Marko Rubioni Davlat kotibi, kongressmen Mett Getsni esa Adliya vaziri va Bosh prokuror etib tayinlash niyatida ekanini ma’lum qildi. Shuningdek, Tramp “Fox News” telekanali boshlovchisi Pit Xegsetni Pentagon rahbari, kongressmen Mayk Valsni Milliy xavfsizlik bo‘yicha maslahatchi va biznesmen Ilon Maskni AQSH Hukumat samaradorligi departamentiga rahbar etib tayinlashga qaror qilgan edi. Shuningdek, Donald Tramp “Fox Business” telekanali boshlovchisi va iqtisodchi Larri Kadlouni iqtisodiyot va moliya sohasida yuqori lavozimga tayinlashni rejalashtirmoqda. Tramp Oq uy tarixidagi eng yosh matbuot kotibini ham tayinlagandi.

Mohinur Karimova