Tramp inauguratsiya marosimini Kapitoliy ichkarisiga ko‘chirdi

2025 yil 20 yanvarda Donald Trampning inauguratsiyasi Vashingtondagi Kapitoliy binosi tashqarisida emas, ichida bo‘lib o‘tadi. Bu haqda respublikachining o‘zi 17 yanvar kuni TruthSocial ijtimoiy tarmog‘ida yozgan.

Trampning aytishicha, AQSH poytaxtida 20 yanvar kuni sovuq Arktika shamollari va “rekord darajada past harorat” kuzatilishi kutilmoqda. Meteorologiya xizmati ma’lumotlariga ko‘ra, dushanba kuni Vashingtonda havo harorati kunduzi -5°S, kechasi esa -12°S gacha tushishi kutilmoqda. Respublikachining fikricha, bu minglab favqulodda vaziyatlar xodimlari va marosim tomoshabinlari uchun xavfli bo‘lishi mumkin.

"Men odamlarning hech qanday zarar ko‘rishini yoki jarohatlanishini xohlamayman. Shuning uchun men inauguratsiya nutqi, shuningdek, ibodatlar va boshqa nutqlarni Kapitoliy Rotundada aytishni buyurdim", deb yozgan saylangan prezident.

Donald Tramp “Capital One Arena”da tomoshabinlar uchun marosimning jonli efiri tashkil etilishini qayd etdi. Trampning o‘zi o‘z tarafdorlarini kutib olish uchun lavozimga kirishgach, u yerga kelishga va’da bergan.

Vashingtondagi Milliy alleyida marosim o‘tkazilishi rejalashtirilgan Kapitoliy zinapoyasi oldida allaqachon minglab stullar o‘rnatilgan. Endi ular kerak bo‘lmaydi. Kapitoliy rotundadagi zalning o‘zi bir necha yuz kishini sig‘dira oladi.

Odatda AQSH prezidentining inauguratsiya marosimi Kapitoliy binosi oldidagi ko‘chada bo‘lib o‘tadi. Masalan, Tramp 2017 yil 20 yanvarda lavozimga kirishganida ham shunday bo‘lgan. Respublikachining o‘zi eslaganidek, 1985 yilda Ronald Reyganning inauguratsiyasi paytida sovuq ob-havo tufayli marosim Kapitoliy rotundasiga ko‘chirilgan edi.

Ma’lumot uchun, AQSHning to‘qqizinchi prezidenti Uilyam Genri Xarrison 1841 yilda inauguratsiya marosimida yomon ob-havoga e’tibor bermay, shlyapa yoki paltosiz shamolda turib uzoq nutq so‘zlagan. Bir oy o‘tgach, 68 yoshli siyosatchi pnevmoniyadan vafot etgan.