Tramp Eronni bombardimon qilish bilan tahdid qildi

AQSH Prezidenti Donald Tramp Eron yadro quroli bo‘yicha kelishuvga erishmasa, misli ko‘rilmagan bombardimonlarga duch kelishi muqarrarligini aytdi. Bu haqda u kecha, 30 mart kuni “NBC News”ga telefon orqali bergan intervyusida ma’lum qildi.

Nashrning yozishicha, Eron Qo‘shma Shtatlar bilan yadroviy qurol ishlab chiqish bo‘yicha kelishuvga erishmasa, misli ko‘rilmagan bombardimonlarga duch keladi. Oq uy rahbari Tehronga harbiy harakatlar bilan tahdid qilgan.

“Agar ular bitim tuzishmasa, bombardimon bo‘ladi. Bu ular hech qachon ko‘rmagan bombardimonlar bo‘ladi”, deya ogohlantirgan Oq uy rahbari.

O‘z navbatida, Eronning IRNA davlat agentligi Eron Prezidenti Mas’ud Pezeshkiyonning Trampning yaqinda yo‘llagan maktubiga javobi haqida xabar bergan. Uning ta’kidlashicha, Tehron Vashington bilan muloqotga ochiq, biroq vositachilar orqali.

north_east

Eron AQSH bilan muzokara o‘tkazmaydi – Xomanaiy

“Garchi javobda ikki tomon o‘rtasida to‘g‘ridan-to‘g‘ri muzokaralar o‘tkazish imkoniyati istisno etilsa-da, unda bilvosita muzokaralar uchun yo‘l ochiqligi aytilgan”, deyiladi xabarda.

Qo‘shimcha qilinishicha, muzokaralar jarayonining davom etishi Amerika tomonining xatti-harakatlariga bog‘liq.

Eslatib o‘tamiz, avvalroq Eron Prezidenti Mas’ud Pezeshkiyon AQSH kuchli bosim qilayotgan paytda yadroviy kelishuv bo‘yicha muzokaralar o‘tkazishdan bosh tortgandi. Uning aytishicha, AQSH muzokaralarni bahona qilib, Eronning yadro dasturidan tashqari harbiy salohiyati va mintaqadagi ta’sirini ham cheklashga harakat qilmoqda. Tehron esa “maksimal bosim” ostida hech qanday muloqot bo‘lmasligini ta’kidlagan.