Tojikistonda parlament saylovi qachon o‘tkazilishi ma’lum bo‘ldi

Tojikiston parlamenti (Majlisi Oliy) ning quyi palatasi – Majlisi Namoyandagon, shuningdek, viloyat, shahar va tumanlarning qonun chiqaruvchi organlariga saylovlar 2025 yilning 2 mart kuni bo‘lib o‘tadi. Bu haqda bugun, 4 dekabr kuni mamlakat Prezidenti Imomali Rahmon imzolagan farmonda keltirilgan.

Bundan tashqari, xuddi shu oyda parlamentning yuqori palatasiga ham saylovlar bo‘lib o‘tadi. Farmonga ko‘ra, Majlisi Milliy (Tojikiston parlamenti yuqori palatasi)ga saylovlar 2025 yil 28 martga belgilangan.

Shuningdek, qonunda belgilangan tartibda shahar va qishloqlarning o‘zini o‘zi boshqarish organlari deputatlari saylovi ham 2 mart kuni mamlakat parlamenti quyi palatasiga saylov bilan bir vaqtda o‘tkazilishi qayd etilgan.

Majlisi Namoyandagon tarkibiga 63 deputat kiradi, ulardan 41 nafari bir mandatli saylov okruglaridan, yana 22 nafari umumrespublika saylov okrugidan saylanadi. Majlisi Milliy 33 a’zodan iborat. Ulardan 25 nafari viloyat va shahar majlislari tomonidan saylanadi, yana 8 kishi esa mamlakat Prezidenti tomonidan tayinlanadi.

Tojikiston parlamenti – Majlisi Oliyning vakolat muddati besh yil. Oliy qonun chiqaruvchi organning har ikki palatasiga avvalgi saylovlar 2020 yilning mart oyida bo‘lib o‘tgan edi. Ayni paytda Majlisi Namoyandagondagi 63 o‘rindan 47 tasini Tojikiston Xalq demokratik partiyasi vakillari egallab turibdi, uning yetakchisi mamlakat Prezidenti Imomali Rahmonning shaxsan o‘zi, qolgan o‘rinlar esa Iqtisodiy islohotlar partiyasi, Agrar partiya, shuningdek, boshqa partiya vakillarida qolmoqda.

Eslatib o‘tamiz, joriy yilning 27 oktyabr kuni O‘zbekiston Respublikasi Oliy Majlisi Qonunchilik palatasi va mahalliy Kengashlar deputatlari saylovi bo‘lib o‘tgandi. Qonunchilik palatasi saylovlari ilk marta majoritar-proporsional (aralash) tizim asosida o‘tkazildi.