Tojikiston rahbari fuqarolarini vatan himoyasiga shay turishga chaqirdi 

Tojikiston Prezidenti Imomali Rahmon mamlakatdagi va xorijdagi vatandoshlarini dunyoda og‘irlashib borayotgan vaziyat, yangi sovuq urush, tez qurollanish, shuningdek, terrorizm va ekstremizm tufayli ogoh bo‘lishga va o‘z vatanini himoya qilishga tayyor bo‘lishga chaqirdi. Bu haqda davlat rahbari 9 sentyabr kuni nishonlanadigan Tojikiston mustaqilligining 33 yilligi munosabati bilan yo‘llagan tabrigida aytib o‘tdi.

“Oxirgi 4-5 yil ichida dunyoda vaziyat tobora murakkablashib bormoqda, qurollanish, sovuq urush, zamonaviy dunyoning tahdid va xatarlari, jumladan, terrorizm va ekstremizm, kiberjinoyatlar va boshqa transmilliy uyushgan jinoyatlar har kuni davom etmoqda. Ana shunday notinch zamonda biz hamisha ogoh bo‘lib, mustaqillik va ozodlikni himoya qilishga tayyor turishimiz kerak”, deydi u.

Prezident, shuningdek, so‘nggi yillarda dunyo mamlakatlari iqlim o‘zgarishi oqibatlari, jumladan, qurg‘oqchilik, tabiiy ofatlar, yuqumli kasalliklar tarqalishiga duch kelayotganini ta’kidladi.

“Eslatib qo‘ymoqchimanki, zamonaviy tahdid va xavf-xatarlarning salbiy ta’siri, qayd etilgan muammolar bizning jonajon Tojikistonimizga ham taalluqlidir”, deydi Imomali Rahmon.

Rahmon respublikada xavfsizlik va barqarorlikni ta’minlash nafaqat hukumatning ustuvor yo‘nalishi, balki o‘z mamlakati har bir vatanparvarining asosiy vazifasi ekanini ta’kidladi. U yoshlarni vatanparvarlik tuyg‘usini yuksaltirish uchun tojik xalqining an’analari bilan tanishtirish zarurligini ta’kidlab, mamlakat hukumati tashabbusini ham eslatdi: har bir oilaga fors adabiyoti klassiki Abulqosim Firdavsiyning “Shohnoma” poemasi hamda sharqshunos olim va Tojikiston qahramoni Bobojon G‘ofurovning “Tojiklar” kitobini sovg‘a qilish.

Rahmon, shuningdek, mustaqillikka erishilgani va 1992-1997 yillardagi fuqarolar urushi tugaganidan keyin mamlakatda kambag‘allikni qisqartirish va infratuzilmani barpo etish borasida erishilgan muvaffaqiyatlarni qayd etdi.